Илон Маск АПЛ клубини сотиб олиши мумкин

Америкалик миллиардер Илон Маск Англия Премьер-лигасининг тарихий клубларидан бири – “Эвертон”ни сотиб олиш учун эҳтимолий номзод сифатида тилга олинди. Бу ҳақда “TEAMtalk” нашри хабар берди.

“Эвертон”нинг собиқ ҳимоячиси Майкл Болл Маскни Мерсисайд клубини сотиб олишга чақирган. Кеча, 9 октябрь куни у X ижтимоий тармоғи орқали миллиардерга мурожаат қилиб, унинг “Ливерпуль”га инвестиция киритган Жефф Безос билан рақобатга киришиши мумкинлигини таъкидлаган.

Бу мурожаат “Эвертон”нинг амалдаги эгалари – The Friedkin Group клуб акцияларининг назорат пакетини сотиш имкониятини ҳам ўз ичига олган янги инвестиция вариантларини ўрганаётганини тасдиқлаганидан кейин янгради. Америка компанияси клубни 2024 йил декабрь ойида сотиб олган. Ҳозирда жараённи бошқариш учун Moelis & Company инвестиция банки жалб этилган.

Ливерпуль футбол оламидаги сўнгги ўзгаришлар ҳам ушбу масалага эътиборни кучайтирди. 2026 йил август ойида Жефф Безос иштирокидаги консорциум Fenway Sports Group компаниясидан “Ливерпуль” клубининг 38 фоиз улушини сотиб олгани хабар қилинганди. Майкл Боллнинг фикрича, Маск “Эвертон”ни сотиб олиш орқали шаҳарнинг асосий рақиби билан рақобатга киришиши мумкин.

Бироқ ҳозирча бу фақат оммавий таклиф бўлиб қолмоқда. Илон Маскнинг “Эвертон”ни сотиб олишга қизиқиш билдиргани ёки клуб раҳбарияти билан музокаралар олиб бораётгани ҳақида расмий маълумот йўқ.