Икки миллион мухлис Пикени ҳақорат қилди

Бразилиянинг Рио-де-Жанейро шаҳрида машҳур қўшиқчи Шакиранинг концерти вақтида тахминан икки миллион мухлис собиқ “Барселона” ҳимоячиси Жерар Пикени ҳақорат қилди. Бу ҳақда “Pitchfork” нашри хабар берди.

Колумбиялик санъаткор Бразилияда бепул концерт дастурини тақдим этди. Тахминан икки миллион киши жамланган тадбир давомида Шакира саҳнада собиқ турмуш ўртоғи — Пикега ишора қилувчи баёнот берган.

 “Бразилияда қарийб 20 миллион ёлғиз она бор. Улар оиласини боқиш учун жуда кўп меҳнат қилади. Мен ҳам шулардан бириман”, дея мухлисларга мурожаат қилган Шакира.

Шундан сўнг, томошабинларнинг бир қисми мусиқа ритмига мос ҳолда Пикега қарши ҳақоратли шиорлар айта бошлаган.

Маълумот учун, Жерар Пике ва Шакира 2022 йилда футболчининг хиёнати ҳақидаги миш-мишлар ортидан ажрашган эди. Уларнинг икки нафар ўғли бор. Пике эса, 2022 йил ноябрь ойида профессионал футболчилик фаолиятини якунлаганини эълон қилган.