Грузиянинг Ўзбекистондаги янги элчиси тайинланди

Бугун, 19 февраль куни Грузиянинг Ўзбекистондаги янги тайинланган элчиси Давид Котариа Ўзбекистон Ташқи ишлар вазири Бахтиёр Саидовга ишонч ёрлиқларининг нусхаларини топширди. Бу ҳақда Саидов ўз Telegram-каналида ёзиб қолдирган. 

Дастлаб, вазир янги тайинланган элчига ўз табригини билдирган.

“Давид Котариа жанобларини Грузиянинг Ўзбекистондаги Фавқулодда ва мухтор элчиси этиб тайинлангани билан самимий табриклаймиз. Бугун уларнинг ишонч ёрлиқлари нусхаларини қабул қилдик”, дея ёзган Саидов.

Қолаверса, Саидов янги элчи билан келажакда режалаштирилган ишларни муҳокама қилган.

“Мамлакатларимиз ўртасидаги икки томонлама алоқаларни кенгайтириш йўлларини муҳокама қилиб, ҳамкорликнинг устувор йўналишларини белгилаб олдик. Ташқи ишлар вазирлиги жаноб элчини Ўзбекистонда самарали дипломатик миссиясини амалга оширишда ҳар томонлама қўллаб-қувватлашга тайёрдир”, дея ёзади Ташқи ишлар вазири.

Эслатиб ўтамиз, бугун, 19 февраль куни Ўзбекистон Ташқи ишлар вазири Бахтиёр Саидов Эстониянинг янги тайинланган элчисидан ишонч ёрлиқларини қабул қилиб олганди.