Германияда 60 йилдан сўнг йўловчи самолёти ишлаб чиқариш тикланди

Германия 60 йилдан ортиқ танаффусдан сўнг йўловчи самолёти ишлаб чиқаришни қайта йўлга қўймоқда. Бу ҳақда “Naked Science” хабар берди.

Қайд этилишича, Deutsche Aircraft компанияси жорий йилнинг 29 сентябрь куни Лейпциг/Галле аэропортида D328eco минтақавий турбовинтли самолётининг якуний йиғиш линияси учун мўлжалланган янги ишлаб чиқариш биносини очган.

Ишлаб чиқариш биносининг майдони 60,5 минг квадрат метрни ташкил этади. Бу қарийб саккизта футбол майдонига тенг. Корхона тўлиқ қувватда ишлаганида йилига 48 тагача самолёт ишлаб чиқариши мумкин.

Deutsche Aircraft бош директори Нико Нойманнинг айтишича, лойиҳа Германия авиация саноатининг илдизларига қайтишини англатади. Унинг сўзларига кўра, 60 йилдан ортиқ вақт ичида илк бор самолётнинг бутун ҳаётий цикли Германиядаги ягона дастур доирасида бирлаштирилади.

D328eco мутлақо янги самолёт эмас. У 1991 йилнинг декабрида илк парвозини амалга оширган Dornier 328 самолётининг такомиллаштирилган версияси ҳисобланади. Мазкур моделнинг ишлаб чиқарилиши Fairchild Dornier компанияси банкрот бўлганидан сўнг 2002 йилда тўхтатилган.

Deutsche Aircraft янги версияда самолёт фюзеляжини қарийб икки метрга узайтириб, 23,3 метрга етказган. Йўловчи сиғими эса 40 нафаргача оширилган. Бу дастлабки моделга нисбатан қарийб 20 фоиз кўп.

Самолёт аввалги двигателлар ўрнига ҳар бири 2 750 от кучига эга PW127XT-S турбовинтли двигателлар билан жиҳозланади. Экипаж кабинаси ва борт авионикаси ҳам тўлиқ янгиланган.

D328eco’нинг илк парвоз нусхаси 2025 йил май ойида Оберпфаффенхофендаги йиғув цехидан чиқарилган. Ўша вақтда компания самолёт турига сертификат олиш ва уни 2027 йилнинг тўртинчи чорагида тижорий фойдаланишга топширишни режалаштирган.