Германия ва Франция Россияга янги санкциялар билан таҳдид қилди

Германия ва Франция урушни тугатиш учун Россияга босимни кучайтириш, мамлакатга қарши янги санкциялар қўллашни режалаштирмоқда. Бу ҳақда кеча, 29 август куни Франциянинг Тулон шаҳрида ўтган ҳукуматлараро маслаҳатларда қабул қилинган қўшма баёнотда сўз боради.

Унда Германия канцлери Фридрих Мерц ва Франция Президенти Эммануэль Макрон иштирок этган. 

Икки давлат Россиянинг Украинага қарши олиб борган сўнгги ҳужумидан сўнг, Киевга ҳаво мудофаасида ёрдамни кенгайтиришга ваъда берган ҳамда Москвага қарши янги санкциялар киритиш эҳтимолини билдирган.

Етакчилар иштирокида қабул қилинган баёнотда эса Россия агрессив урушни тугатишга тайёрлигини кўрсатмаётгани, янги санкциялар Россия билан бирга урушни қўллаб-қувватлаётган учинчи давлат компанияларига ҳам қаратилиши мумкинлиги ҳамда Германия ва Франция бу ташаббусни G7 ва Европа Иттифоқи йиғилишларида илгари суриши қайд этилган. 

Шунингдек, икки давлат оммавий ахборот воситалари дезинформацияга қарши кураш соҳасида ҳамкорликни кучайтириш бўйича декларация имзолаган. “Deutsche Welle” ва “France Médias Monde” ўртасида ҳамкорлик чуқурлаштирилади, шунингдек, француз-немис канали бўлмиш “Arte”нинг фаолияти бошқа Европа мамлакатларига ҳам кенгайтирилади.

Украинанинг яқин дўсти сифатида Германия ва Франция мамлакатлари Россиядаги урушни тугатиш учун тез-тез ва шов-шувли баёнотлар бераётгани, Россияга имкони борича босим қилаётгани кўзга ташланмоқда. Масалан, аввалроқ Макрон ўзининг ижтимоий тармоқлардаги саҳифаларида Россиянинг Киевга амалга оширган кечки ҳужумларини қоралаб, Москвани очиқдан-очиқ террорчилик ҳаракатида айблаганди. Германия канцлери эса 26 август куни Берлинда Канада Бош вазири Марк Карни билан биргаликда ўтказган матбуот анжуманида Россия Украина бўйича музокараларда эски услуби – вақтни чўзиш стратегиясини қўллаётгани ҳақида айтганди. Унга кўра, Москва Владимир Путин ва Владимир Зеленский учрашувини олдиндан белгиланган шартларга боғлаб, уни имконсиз ҳолатга келтирмоқда. Мерц бундай талабларни Германия ҳам, Украина ҳам мутлақо қабул қилиб бўлмайдиган деб ҳисоблашини таъкидлаган.