Германия канцлери Украина бўйича йирик дипломатик ташаббусни эълон қилди

Германия канцлери Фридрих Мерц Киевга ташрифи чоғида Украинада 30 кунлик сўзсиз ўт очишни тўхтатиш масаласида Германия, Франция, Буюк Британия ва Польшанинг “буюк бирлиги”ни таъкидлади. Мерц бу ҳақда бугун, 10 май куни Германиянинг ZDF телеканалидаги “Heute Journal” дастури эфирида маълум қилди.

“Бу Украинадаги урушни тўхтатиш бўйича сўнгги ойлардаги, балки йиллардаги энг йирик дипломатик ташаббус”, деди Мерц.

Унинг сўзларига кўра, гап музокаралар ҳақида эмас, балки АҚШ ва Европа томонидан билдирилган таклиф ҳақида кетмоқда.

“Бу таклиф ўт очишни тўхтатиш ҳақида. Ўт очишни тўхтатиш эса ҳар икки томоннинг ўт очишни тўхтатишини англатади”, деди Германия ҳукумати раҳбари.

Фридрих Мерцнинг айтишича, бу ташаббус АҚШ Президенти Дональд Трамп билан келишилган. Немис сиёсатчисига кўра, Вашингтон “ўт очишни тўхтатиш режимини текшириш ва кузатиш” мажбуриятини олган.

Германиянинг ARD жамоат-ҳуқуқ телеканалининг “Tagesthemen” дастурида Мерц яқин келажакда Россиянинг Украинадаги урушини тугатиш учун “озгина имконият” кўришини айтди. Унинг сўзларига кўра, Россия Президенти Владимир Путин ҳарбий ҳаракатларни давом эттириш умидсизлигини англаши керак.

Федерал канцлер, агар Путин Ғарбнинг таклифини қабул қилмаса, Украинани қўллаб-қувватлашда давом этиши ва Россияга қарши яна бир санкциялар пакети жорий этилишига ишора қилиб, Европа Иттифоқида чекловчи чораларнинг 17-раундига тайёрланаётганини тасдиқлаган.

Билдирилишича, Германия Киевни европалик ҳамкорлари билан келишилган ҳолда қўллаб-қувватлашда давом этади, шунда у Россия тажовузкорлигига “қаршилик кўрсатишда давом этиш имкониятига эга бўлади”.

“Германия четда қолмайди”, дея хулоса қилди Мерц.

Германия канцлери Киев учун эҳтимолий хавфсизлик кафолатларига ҳам изоҳ берди: 
“Украина мудофаа қобилиятини сақлаб қолиши керак, Украина ҳам Европа Иттифоқига аъзо бўлиши керак”.

Унинг тан олишича, Европа Иттифоқи мудофаа соҳасидаги саъй-ҳаракатларини “кўп йиллар, балки ўнлаб йиллар давомида” давом эттириши керак.

Мерц, Франция Президенти Эммануэль Макрон, Буюк Британия Бош вазири Кир Стармер ва Польша Бош вазири Дональд Туск 10 май куни Киевда Украина Президенти Владимир Зеленский билан учрашди.

Украина Ташқи ишлар вазири Андрей Сибиганинг сўзларига кўра, сиёсатчилар Трамп билан Украина учун “тинчлик ҳаракатлари” ҳақида қўшма “самарали” телефон суҳбати ўтказган.

“Кўнгиллилар коалицияси” йиғилиши якунлари бўйича Украина ТИВ раҳбари Киев ва унинг иттифоқчилари 12 майдан бошлаб “қуруқликда, ҳавода ва денгизда тўлиқ, сўзсиз ўт очишни тўхтатишга тайёрлигини” маълум қилди.

“Агар Россия рози бўлса ва самарали мониторинг таъминланса, доимий оташкесим ва ишончни мустаҳкамлаш чоралари тинчлик музокараларига йўл очиши мумкин”, деди Сибига.

“Кўнгиллилар коалицияси”га, хусусан, Германия, Буюк Британия ва Франция киради. Ҳаммаси бўлиб гуруҳга 30 га яқин давлат киради.

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от QALAMPIR.UZ (@qalampir.uz)

Ташриф Москвада ўнлаб мамлакатлар раҳбарлари, жумладан, Хитой раҳбари Си Цзиньпин, Сербия Президенти Александр Вучич ва Словакия Бош вазири Роберт Фицо иштирок этган кенг кўламли ҳарбий параддан бир кун ўтиб амалга оширилмоқда.