Ғазода нафақат геноцид, балки экоцид ҳам юз берди – Эрдўған

Бугун, 11 ноябрь куни Туркия Президенти Ражаб Тойиб Эрдўған Анталияда ўтаётган БМТнинг Иқлим ўзгариши бўйича 31-конференцияси (COP31) Етакчилар саммитининг очилиш маросимида нутқ сўзлаб, дунё ҳамжамиятини иқлим таҳдидларига қарши курашда биргаликда ҳаракат қилишга чақирди. Шунингдек, у Ғазодаги болалар совуқдан титраб, тирик қолишга уринаётганини қайд этди.

Эрдўған қуролли низоларнинг оғир бадалини нафақат одамлар, балки табиат ҳам тўлаётганини, бунга энг яққол мисол Ғазо секторидаги вазият эканини айтган.

“БМТ Бош Ассамблеясидаги нутқимда қайд этганимдек, Ғазода нафақат геноцид, балки экоцид ҳам юз берди: асрий дарахтлар кесиб ташланди, тупроқ ва сув ифлослантирилди, шаҳарлар вайронага айлантирилди. Биз бугун Исроилдан контейнерлар сўрамоқдамиз, аммо Ғазодаги фаластинлик биродарларимиз, минг афсуски, лойқа ботқоқлик ўртасида чодирларда яшашга мажбур бўлишмоқда. Ахир улар одам эмасми? Бу одамларга лоақал битта чодир йўқми? Биз контейнерлар юбормоқчимиз, лекин бунга йўл қўйишмаяпти”, дейди Туркия етакчиси.

Эрдўған сўнгги кунларда минтақадан келаётган “юракни ёргувчи янгиликларга” эътибор қаратган. Ғазода вайрон бўлган инфратузилма кучли ёмғирлар ва сув тошқинлари билан қўшилиб, ўн минглаб чодирлар ва бошпаналарни сув остида қолдирди.

“Бошпанасиз қолган юз минглаб Ғазо аҳолиси, жумладан, ҳимоясиз болалар, ёмғир остидаги қиш шароитида, аксарият ҳолларда ота-онасиз, совуқдан титраб тирик қолишга ҳаракат қилмоқда. Мен очиқ айтишим керак: Ғазодаги бутун инсоният учун шармандали бўлган бу геноцид манзарасини кўриб, билиб ва гувоҳи бўлаётган ҳеч бир инсон масъулиятдан қочиб қутула олмайди”, дейди Туркия Президенти.

Туркия раҳбари Ғазо болаларининг фожиасидан куч кўргазмаси сифатида фойдаланиш бу ожизлик, нотавонлик ва энг аввало бағритошлик эканини таъкидлаган ҳамда минтақага гуманитар ёрдам ўтишига зудлик билан рухсат беришга чақирган. 

“Изоляция сиёсати тўхташи керак, бу шафқатсизлик ва ғайриинсонийлик ниҳоят тўхтатилиши ва таг-томири билан йўқ қилиниши керак”, дейди Президент.

У конференция иштирокчиларини Анталиядан туриб бутун дунёга кучли иродани намоён этишга, адолатли бўлишга, ҳамжиҳатликда ишлаб чиқаришга ва қўйилган мақсадларни қатьият билан амалга оширишга чақирган.

“Бу ҳафтадаги маслаҳатлашувлар билан ушбу конференция ҳамжиҳатлик ва аниқ илгарилашнинг кучли намунасига айланишини таъминлаймиз. Энг муҳими, иқтисодиёт учун экологияни қурбон қиладиган фикрлашга “стоп” деймиз”, дейди Президент.

Эслатиб ўтамиз, аввалроқ Туркия Анталияда ўтказилаётган БМТнинг Иқлим ўзгариши бўйича 31-конференцияси доирасидаги Етакчилар саммитида иштирок этиш учун Исроил ҳукуматига таклифнома юбормагани ҳақида хабар берилган эди.