Ғазода Исроил тарқатаётган ун халталаридан наркотик топилди

АҚШ ва Исроил кўмагида ташкил этилган “Ғазо гуманитар ёрдами фонди” орқали фаолият юритаётган гуманитар ёрдам марказларида тарқатилаётган ун халталарида наркотик таъсирга эга дори воситалари аниқланган. Бу ҳақда Газо сектори ҳукумати матбуот хизматига таяниб, “Quds news network” хабар берди.

Хабарга кўра, тўрт киши АҚШ-Исроил гуманитар ёрдам марказларидан олинган ун халталари ичида оксикодон туридаги наркотик модда сақловчи таблеткаларни топган.

“Бундай моддаларнинг ун халталарига жойлаштирилиши фуқаролар саломатлиги ва жамият тузилмасига қарши йўналтирилган жирканч жиноят ҳисобланади”, дейилади хабарда.

Шундан сўнг, Ғазо ҳукумати Исроилни гуманитар ёрдам ниқоби остида фаластинликлар орасида гиёҳвандликни ёйишга уринишда айбламоқда. Уларнинг сўзларига кўра, бундай моддаларни “ифлос урушнинг юмшоқ воситаси” сифатида ишлатиш ҳарбий жиноят бўлиб, халқаро гуманитар ҳуқуқ меъёрларига зид.

Ҳукумат аҳолига мурожаат қилиб, бундай марказлардан олинган ёрдам маҳсулотларини синчиклаб текширишга, шунингдек, ҳар қандай шубҳали моддалар топилганда зудлик билан хабар беришга чақирган. Ота-оналарга эса болаларни бундай марказларга бориш хавфи ва наркотик моддаларнинг таҳдиди ҳақида огоҳлантириш тавсия этилган.

Баёнотда халқаро ҳамжамиятга мурожаат қилиниб, “ўлим тузоғи”га айланган ва юзлаб инсонларнинг ўлимига сабаб бўлган бу каби марказларнинг фаолиятини тўхтатишга даъват қилинган.

Ғазо ҳукумати маълумотларига кўра, жорий йил 27 майдан 25 июнга қадар ушбу ёрдам марказларида 549 нафар фаластинлик ҳалок бўлган, яна 4066 киши тан жароҳати олган.

Эслатиб ўтамиз, аввалроқ Исроил томонидан Ғазо шаҳрининг турли ҳудудларига ва Ғазо жанубида инсонпарварлик ёрдамини кутаётган фуқаролар тўпланган жойларга уюштирилган ҳаво ҳужумлари оқибатида камида 24 нафар тинч аҳоли вакили ҳалок бўлгани, яна ўнлаб одамлар жароҳат олгани хабар қилинганди.