Хорижлик талабаларнинг Гарвардда ўқиши тақиқланди

АҚШ Президенти Дональд Трамп маъмурияти Гарвард университетига чет эллик талабаларни қабул қилишни тақиқлади. Бу ҳақда кеча, 22 май куни “The New York Times” газетаси хабар берди.

АҚШ Ички хавфсизлик вазири Кристи Ноэм Гарвардни “зўравонлик ва антисемитизмни рағбатлантириш” ва Хитой Коммунистик партияси билан ҳамкорлик қилишда айблаб, олийгоҳ сертификатини дарҳол бекор қилишни буюрди. Энди нуфузли Америка IVY League таркибига кирувчи университет хорижликларга АҚШга талабалик визаларини олиш учун зарур ҳужжатларни бера олмайди. Гарвардда ўқиган халқаро талабалар бошқа университетга ўтишлари ёки мамлакатда қолиш ҳуқуқидан маҳрум бўлишлари керак.

Гарвард университети маъмурлари Трамп маъмуриятининг ҳаракатларини ноқонуний ва қасоскор, шунингдек, университетнинг академик ва тадқиқот миссиясига путур етказиш, деб атади.

Ҳозирда Гарвардда 140 мамлакатдан 7000 га яқин халқаро талабалар бор, бу унинг умумий талабалар жамоасининг чорак қисмидан кўпроғини ташкил қилади.

Гарвард АҚШ ҳукумати талабларини рад этади

Гарвард университетига 2,2 миллиард доллар федерал грантлар апрель ойи ўрталарида музлатиб қўйилди. Уларни музлатмаслик учун университетдан “Америка қадриятлари ва институтларига душман” хорижликларни ўқитишни рад этиш тизимини ишлаб чиқиш ва антисемитизм ва нафрат нутқининг бошқа шакллари бўйича мавжуд дастурларни ташқи экспертлар билан текшириш керак эди.

Университет раҳбарияти бу талабларни бажаришдан бош тортди ва АҚШ маъмурияти устидан судга мурожаат қилиб, молиялаштиришни тиклашни талаб қилди. Апрель ойи охирида Гарвард университети иккита ҳисобот эълон қилди: бири кампусдаги антисемитизм ва Исроилга қарши кайфият ҳақида, иккинчиси эса исломга қарши.

Иккала ҳисобот муаллифлари кампус маданияти ва университетнинг вазиятга муносабатини танқид қилади. Шу билан бирга, улар университетдаги зарур ислоҳотларни “ташқи кучлар” босими остида эмас, балки “ички жараёнларга таянган ҳолда ва Гарвард ҳамжамиятининг кенг қўллаб-қувватлаши билан” амалга ошириш керак, деган фикрни билдиришмоқда.

Шундан сўнг Гарвард университети президенти Алан Гарбер университет талабалар ва ходимларнинг умидларини қондира олмагани учун узр сўради. Шунингдек, у Исроилга қарши антисемитизм ва тарафкашликка қарши кураш бўйича янги ташаббусларни эълон қилди.

Ўнлаб университетлар босим остида қолиши мумкин

“Гарвард университети Трамп маъмуриятининг ягона мақсади эмас; Америка ҳукумати яна 60 та университетни “чап-либерал” мафкурани тарғиб қилишда айбламоқда”, деб хабар беради  ARD Tagesschau ахборот дастури веб-сайти.

Унга кўра, АҚШ расмийлари ушбу университетларга ҳам худди шундай чекловлар қўйиши мумкин.