Pentagon Garvard bilan aloqalarni uzdi (video)

AQSH Mudofaa vaziri Pit Hegset Pentagon Garvard universiteti bilan akademik hamkorlikni to‘xtatayotganini e’lon qildi. Bu haqda u bugun, 7 fevral kuni o‘zining X ijtimoiy tarmog‘idagi sahifasida ma’lum qildi.

“Juda uzoq vaqt davomida biz universitet bizning jangovar qatlamimizni yaxshiroq tushunadi va qadrlaydi degan umidda eng yaxshi ofitserlarimizni Garvardga yubordik. Buning o‘rniga, ularning ko‘pchiligi Garvardga o‘xshab qaytdi – boshlarida globallashuv va radikal mafkuralar bilan to‘lib-toshgan holda, bu esa jangovar safimizni mustahkamlamaydi”, deydi Hegset.

2026–2027 o‘quv yilidan boshlab Pentagon ushbu universitetda oliy o‘quv yurtidan keyingi professional harbiy ta’lim dasturlari, stipendiyalar va sertifikat dasturlarini to‘xtatadi. Hozirda tahsil olayotgan harbiy xizmatchilar esa o‘z kurslarini yakunlashlari mumkin bo‘ladi.

Hegsetning aytishicha, o‘tmishda AQSH harbiylari Garvard bilan muhim va ko‘pincha ijobiy munosabatlarga ega bo‘lgan.

“1775 yilda general Jorj Vashington Garvard hovlisida Kontinental armiya qo‘mondonligini qabul qilgan va universitetni harbiy baza sifatida ishlatgan. O‘shandan Koreya urushigacha Garvardda harbiy xizmat odatiy hol edi. AQSHdagi boshqa har qanday fuqarolik o‘quv muassasasiga qaraganda Ko‘ngil jasorati medali sohiblari ko‘proq Garvardda tahsil olgan”, deydi u.

Vazirning so‘zlariga ko‘ra, bugungi kunda esa Garvard endi harbiy xizmatchilar uchun do‘stona institut yoki ularning rivojlanishi uchun mos joy emas. Hegset, shuningdek, Garvardning xorijiy davlatlar bilan aloqalarini va universitet madaniyatini “muammo” deb atagan. Uning fikricha, bu harbiy va Amerika qadriyatlariga mos kelmaydi.

“Universitetning tadqiqot dasturlari Xitoy Kommunistik partiyasi bilan hamkorlik qilgan. Universitet rahbariyati esa HAMASni ulug‘laydigan, yahudiylarga hujumlarga yo‘l qo‘yadigan va Oliy sud qarorlariga zid ravishda irqiy kamsitishni ilgari suradigan muhitni rag‘batlantirgan”, deydi u.

Hegset yaqin haftalarda Pentagon boshqa universitetlar bilan o‘xshash munosabatlarni ham baholashini ma’lum qilgan.

Qayd etish joiz, Donald Tramp ikkinchi marta Prezidentlikka kirishganidan keyin AQSHdagi oliygohlar va Prezident ma’muriyati o‘rtasidagi ziddiyatlar kuchaydi. Hukumat Garvardni antisemitizmga qarshi yetarli choralar ko‘rmaslikda ayblab, unga ajratiladigan grantlarni muzlatdi va moliyaviy ko‘makni sezilarli darajada qisqartirdi.

Eslatib o‘tamiz, avvalroq hatto Donald Tramp Garvard universitetiga chet ellik talabalarni qabul qilishni taqiqlash haqidagi qarorni imzoladi. Biroq AQSHning Boston federal sudi ushbu qarorni noma’lum muddatga blokladi.