G7 етакчилари Трампни Эрон урушини тезроқ тугатишга чақирди

АҚШ Президенти Дональд Трамп жорий йил 11 март куни бўлиб ўтган онлайн учрашувда G7 етакчиларига Эрон “таслим бўлиш арафасида” эканини айтди. Бу ҳақда “Катта еттилик” мамлакатларининг уч нафар мулозимига таяниб, “Axios” хабар берди.

Мулоқот чоғида Оқ уй раҳбари “арчага таҳдид солаётган саратон ўсимтаси”дан қутулганини айтган.

“Ҳозирда Эроннинг раҳбари кимлигини ҳеч ким билмайди, шунинг учун таслим бўлганини эълон қиладиган одамнинг ўзи йўқ”, дейди у.

Нашр манбаларига кўра, G7 етакчилари Трампни урушни имкон қадар тезроқ тўхтатишга чақириб, Ҳормуз бўғози хавфсизлигини таъминлаш зарурлигини алоҳида қайд этган. Трамп бунга жавобан бўғоздаги вазият яхшиланаётгани ва тез орада тижорат кемалари қатнови тикланишини айтган. Бироқ ўша тунда Эрон қирғоқлари яқинида камида иккита танкер ҳужумга учраган.

Бундан ташқари, Трамп Буюк Британия Бош вазири Кир Стармерга Вашингтон Эронга зарба бериш учун Лондоннинг ҳарбий базаларига эҳтиёж сезмаётганини билдирган. Уруш бошланишидан аввал Британия рухсат бермаган, бироқ кейинчалик Стармер ўз қарорини ўзгартирган эди.

“Буни урушдан олдин таклиф қилиш керак эди. Энди жуда кеч”, дейди Трамп.

Маълумот учун, Яқин Шарқдаги эскалациядан сўнг Эрон Ҳормуз бўғози орқали савдо тўхтатилганини эълон қилди. 4 март куни Ислом инқилоби қўриқчилари корпуси бўғозни тўлиқ назорат қилаётганини маълум қилди. Дунё нефтининг 15–20 фоизи ва суюлтирилган газнинг 30 фоиздан ортиғи айнан шу йўл орқали ўтади. Кема қатновининг тўхташи энергия ресурслари нархининг сакрашига ва глобал озиқ-овқат инқирози хавфига сабаб бўлмоқда.

Эслатиб ўтамиз, аввалроқ АҚШ ҳарбий кучлари Эроннинг Форс кўрфазидаги Харг оролига кенг кўламли зарбалар бергани ҳақида хабар қилинган эди.