Футболнинг янги қоидалари ЖЧда синовдан ўтказилиши мумкин

Халқаро футбол ассоциациялари кенгаши (IFAB) 2026 йилги Жаҳон чемпионати давомида жаҳон футболи учун мўлжалланган янги қоидаларни синовдан ўтказишни таклиф қилди. Бу ҳақда ESPN хабар берди.

IFAB ўйинда вақтни атайлаб чўзишга қарши курашиш бўйича бир қатор чораларни илгари сурмоқда. Жумладан, кенгаш футболчиларни алмаштириш учун 10 сониялик вақт чегарасини жорий этишни таклиф қилмоқда. Ушбу қоида алмаштирилаётган футболчи майдонни тарк этиши лозим бўлган максимал вақтни англатади. Агар футболчи белгиланган 10 сония ичида майдонни тарк этмаса, захирадан майдонга тушаётган футболчи маълум муддатга ён чизиқда қолишга мажбур бўлади.

Шунингдек, кенгаш жароҳат симуляциясига қарши курашиш мақсадида ўйинни тўхтатиш учун қатъий вақт чегарасини жорий этиш таклиф этилмоқда. Ушбу вақт тугагач, жароҳат олган футболчи майдонни
тарк этиши керак бўлади ва учрашув давом эттирилади.

Бундан ташқари, ҳакамлар футболчи атайлаб вақтни беҳуда сарфлаяпти, деб ҳисоблаган ҳолатларда тўп ён чизиқдан ташланиши ёки жарима зарбаси ижро этилиши пайтида беш сония ичида ўйинни бошлашни талаб этилади.

IFAB техник директори Дэвид Эллерейнинг сўзларига кўра, мазкур қоидалар 2026 йилги Жаҳон чемпионатидаёқ синов тариқасида қўлланилиши мумкин. 

Маълумот учун, янги қоидалар бўйича якуний қарор жорий йилнинг 28 февраль куни бўлиб ўтадиган IFAB йиғилишида қабул қилинади.