Футбол сабабли аёл эрини пичоқлади

Жорий йилнинг 22 февраль куни Италия А серияси доирасида “Аталанта” ҳамда “Наполи” ўртасидаги учрашув вақтида оилавий можаро сабаб бир мухлис пичоқланди. Бу ҳақда “The Touchline” нашри хабар берди.

Маҳаллий ҳуқуқни муҳофаза қилиш органлари маълумотига кўра, 40 ёшли эркак ўйинни уйида томоша қилаётган бўлган. VAR тизими “Наполи” фойдасига белгиланган пенальтини бекор қилганидан сўнг, у ҳиссиётларга берилиб, телевизор қаршисида баланд овозда ҳақоратли сўзлар айтган. Унинг яқинида бўлган 35 ёшли рафиқаси бу сўзларни ўзига қаратилган деб ўйлаган. Оқибатда эр-хотин ўртасида оғзаки тортишув бошланган ва у қисқа фурсатда жисмоний тўқнашувга айланган. 

Хабарларга кўра, аёл аввал эрига қайчи улоқтирган, сўнг ошхона пичоғи билан унинг ён қисмига пичоқ санчган. Ҳодиса жойига етиб келган полиция эркак танасида бир нечта пичоқ жароҳатларини аниқлаган.

Жабрланувчи шифохонага етказилиб, зарур тиббий ёрдам кўрсатилган. Шифокорлар унинг ҳаёти хавф остида эмаслигини маълум қилган. Аёл эса ҳибсга олинган, ҳодиса юзасидан тергов ишлари олиб борилмоқда.

Маълумот учун, мазкур учрашувда “Наполи” 1:2 ҳисобида мағлубиятга учраган.