Футбол бўйича энг узун мағлубиятсиз серия рекорди янгиланди

Малайзиянинг “Жохор Дарул Тазим” клуби миллий чемпионатлардаги энг узоқ мағлубиятсиз серия бўйича жаҳон рекордини ўрнатди. Бу ҳақда “Reuters” хабар берди.

Жорий йилнинг 21 август куни Малайзия Суперлигасининг янги мавсумидаги илк учрашувда “Жохор Дарул Тазим” ўз майдонида “Кучинг Сити”ни 3:0 ҳисобида мағлуб этди. Маркос Гильерме 11-дақиқада ҳисобни очган бўлса, Оскар Аррибас ва Шаҳоб Заҳиди иккинчи бўлимда биттадан гол урди.

Бу ғалаба “Жохор Дарул Тазим”нинг миллий чемпионатдаги қаторасига 109-мағлубиятсиз учрашуви бўлди. Клуб 2021 йил апрелидан бери чемпионатда мағлубиятга учрамаяпти.

Шу тариқа Малайзия клуби Кот-д’Ивуарнинг “ASEC Мимозас” жамоасига тегишли бўлган аввалги рекордни янгилади. Африка клуби 1989–1994 йиллар оралиғида миллий чемпионатда 108 та учрашувда мағлубиятга учрамаган эди.

Маълумот учун, “Жохор Дарул Тазим” сўнгги тўрт мавсумда Малайзия Суперлигасида мағлубиятсиз чемпион бўлган. Жамоа шунингдек, қаторасига 13-чемпионлик учун курашмоқда.