Франциядаги тартибсизликлар 1,2 млрд евро зарар келтирган бўлиши мумкин

Францияда оммавий тартибсизликлар оқибатида суғурта компанияларининг зарари 1,2 миллиард еврога етиши мумкин. Мамлакат бўйлаб камида 3 мингта корхона талон-торож қилинган ёки шикастланди. Бу ҳақда “Financial Times” хабар берди.

Таҳлилчиларнинг баҳолашича, ҳозирги тартибсизликлар кўлами ва шиддати, шунингдек, шикастланган мулкни тиклаш харажатларининг инфляция туфайли ошиши суғурта тўловларининг кўпайишига олиб келмоқда. Суғурта брокерлари ҳам зарар миқдори 1 миллиард евродан ошиши мумкинлигини айтмоқда.

“Morningstar DBRS” таҳлилчиси Маркос Альварес Франциядаги воқеаларни табиий офатлар оқибатларига қиёслаган. Унинг фикрича, мамлакатда бундан буён ҳам ҳар йили юз миллионлаб евро зарар келтирадиган шундай тартибсизликлар кузатилиши мумкин.

Қайд этилишича, жорий йил октябрь ойидаги тартибсизликлардан кутилаётган зарар 2023 йилдаги намойишлар оқибатида етказилган зарардан ҳам юқори. Ўшанда суғурта компанияларининг йўқотишлари 798 миллион еврони ташкил этган.

Франция Савдо вазири Серж Папеннинг дастлабки баҳолашига кўра, мамлакат бўйлаб камида 3 мингта корхона тартибсизликлардан зарар кўрган. Шикастланган ёки талон-торож қилинган савдо нуқталари орасида Louis Vuitton ва Kenzo каби қимматбаҳо брендларнинг дўконлари ҳам бор.

Вазиятдан хавотирга тушган айрим тадбиркорлар ўз дўконларини мустақил ҳимоя қилишга тайёргарлик кўрмоқда. “Europe 1” радиостанцияси хабар беришича, Бордо шаҳри ва Жиронда департаментидаги айрим савдогарлар ҳужумлардан ҳимояланиш учун воситалар тайёрлаб қўйган.

Хусусан, кийим-кечак дўкони ходимаси қалампирли баллончани ёнида олиб юришини айтган. Бошқа бир дўкон эгаси эса талончиларга қарши металл таёқлардан фойдаланишга тайёрлигини билдирган.

Бироқ айрим тадбиркорлар ўзини қурол билан ҳимоя қилишдан бош тортмоқда. Улар бундай ҳаракатлар ҳаётига хавф туғдириши ва ҳуқуқий оқибатларга олиб келиши мумкинлигидан хавотирда

Шу билан бирга, Франция ҳукумати Европа Иттифоқининг оммавий тартибсизликлар вақтида мулкка етказилган зарарни қоплаш учун мажбурий суғурта тизимини жорий этишга розилигини олишга ҳаракат қилмоқда. Таклиф этилаётган механизм Caisse Centrale de Réassurance қайта суғурталаш компанияси орқали 4 миллиард еврогача давлат кафолатини назарда тутади.

Янги тизим суғурта компанияларининг бадаллари ҳисобидан молиялаштирилиши режалаштирилган. Бу эса қўшимча харажатлар мижозлар зиммасига юкланишига олиб келиши мумкин. Ҳозирча механизм ишга тушмаган ва у жорий тартибсизликлар оқибатида етказилган зарарни қоплашга татбиқ этилмайди.

Axa суғурта компанияси раҳбари Томас Буберл эса Франция ҳукуматини юз берган воқеалардан хулоса чиқаришга чақирган. Унинг таъкидлашича, давлат ички хавфсизликни таъминлаш бўйича ўз вазифасини бажариши керак.

Францияда оммавий намойишлар сентябрь ойи охиридан бери давом этмоқда. Дастлаб кўчаларга ўқувчилар ва давлат хизматчилари чиққан бўлса, кейинчалик уларга талабалар, касаба уюшмалари ва “Сариқ нимчалар” ҳаракати тарафдорлари ҳам қўшилган. Намойишчилар яшаш харажатлари ошишига қарши чиқиб, иш ҳақи ва пенсияларни кўтаришни талаб қилмоқда.

19 октябрь ҳолатига кўра, намойишлар давомида 2 331 киши қўлга олинган, 500 нафардан ортиқ полициячи, жандарм ва ўт ўчирувчи жароҳатланган. Франция Президенти Эммануэль Макрон зўравонликни қоралаган, бироқ намойишчиларнинг талаблари ҳам эшитилиши кераклигини билдирган.

Эслатиб ўтамиз, аввалроқ Францияда яшаш нархининг ошишига қарши намойишлар оммавий тартибсизликларга айланиб, мамлакат бўйлаб 2 мингдан ортиқ дўкон талон-торож қилингани ҳақида хабар берилган эди.