Францияда ёзги ҳарорат тарихий рекордни янгилади

Францияда жорий йилнинг ёз фасли мамлакатда ҳарорат кузатувлари бошланган 1900 йилдан буён энг иссиқ ёз сифатида қайд этилди. Бу ҳақда “Al Jazeera” хабар берди.

Вазирнинг сўзларига кўра, мамлакатда ёз давомида бир неча бор кучли жазирама кузатилган. Хусусан, июнь ойининг охирида қайд этилган иссиқ тўлқини ўзининг кучи бўйича янги рекорд ўрнатган.

Маълумотларга кўра, ушбу жазирама даврида мамлакатда 2 025 та ортиқча ўлим қайд этилган. Ўлим ҳолатларининг сезиларли қисми 45 ёшдан ошганлар орасида кузатилган.

Июль охиридан август ойигача давом этган навбатдаги иссиқ тўлқини эса 23 кун давом этган. Бу кўрсаткич 1983 йилда қайд этилган рекордни такрорлаган.

Жазирама билан бир қаторда, Франциянинг одатда салқин ва нам бўлган ҳудудларида ҳам йирик ўрмон ёнғинлари юзага келган.

Франция метеорология хизмати “Météo-France” маълумотларига кўра, жорий йилнинг ёзи давомида ёғингарчилик миқдори меъёридан қарийб 40 фоизга кам бўлган. Шу сабабли ёз фасли кузатувлар тарихидаги ёғингарчилик энг кам бўлган иккинчи ёз сифатида қайд этилган.

Ёз давомида мамлакат бўйича ўртача ҳарорат 24 даражани ташкил қилган. Бу одатий кўрсаткичдан 3,6 даража юқори.

“2026 йил ёзи тарихда қолади”, деди Моник Барбют.

Унинг таъкидлашича, эндиликда Франция олдида иқлим ўзгаришларига мослашиш ва иссиқхона газлари чиқиндиларини камайтириш бўйича чораларни кучайтириш вазифаси турибди.

Франция билан бир қаторда Белгия, Буюк Британия ва Ирландияда ҳам 2026 йилнинг ёзида рекорд даражадаги юқори ҳароратлар қайд этилган.

Европа Иттифоқининг Copernicus Climate Change Service маълумотларига кўра, Европа 1980 йиллардан буён глобал ўртача кўрсаткичга нисбатан қарийб икки баробар тез суръатда исиб бормоқда.

Эслатиб ўтамиз, аввалроқ жорий йилнинг ёзида Европада кузатилган кетма-кет 4 та рекорд даражадаги жазирама тўлқини сабабли камида 35 минг киши вафот этгани ҳақида хабар берилган эди.