Франция Ўзбекистондан уран қазиб олмоқчи

Orano ва “Навоийуран” ўзларининг Nurlikum Mining қўшма корхонасининг Жанубий Женгелди уран қазиб олиш лойиҳасини ривожлантириш учун асос яратадиган келишувни эълон қилди. Бу ҳақда Orano компанияси сайтида эълон қилинди.

Келишув шартларига кўра, Жанубий Женгелди лойиҳаси “Навоийуран”нинг мавжуд саноат базасига интеграция қилинади ва лойиҳа оператори сифатида айнан шу компания фаолият юритади. Келишув, шунингдек, янги ҳамкор – Япониянинг ITOCHU Corporation компаниясининг қўшма корхона таркибига кам улушли акциядор сифатида киришини ҳам белгилайди.

Бу янги ҳамкорлик қўшма корхонанинг сўнгги йиллардаги тараққиётини мустаҳкамлаб, Жанубий Женгелди кон лойиҳасини ривожлантириш бўйича барча томонларнинг қатъий интилишини акс эттиради. Бугунги кунга қадар тасдиқланган ресурсларига асосланган ҳолда, Жанубий Женгелди лойиҳаси ўн йил давомида уран ишлаб чиқаришни таъминлай олади ва йиллик 700 метрик тонна уран қазиб олишнинг энг юқори даражасига эришиши кутилмоқда.

Жанубий Женгелди лойиҳаси “Навоийуран” билан амалга оширилаётган кенг кўламли ҳамкорлик дастурининг бир қисми. Бу дастур Orano томонидан 2022 йилда Ўзбекистон давлати билан имзоланган стратегик ҳамкорлик келишуви доирасида белгиланган. Ҳамкорлар, шунингдек, қўшимча геологик-қидирув дастурини амалга оширишни режалаштиришган бўлиб, унинг мақсади – қўшма корхона минерал ресурсларини камида икки баробар ошириш.  

“Ушбу лойиҳа гуруҳимизнинг уран ишлаб чиқариш манбаларини диверсификация қилишга ҳисса қўшади. Бу янги босқич сўнгги 5 йил давомида Ўзбекистонда олиб борилган ишлар туфайли амалга ошди. Orano ўзининг геологик ва техник экспертизасини ушбу лойиҳани янада ривожлантиришга йўналтиришни мақсад қилган ва шу орқали компания операцияларининг кенгайишига кўмаклашади”, деди Ora компаниясининг қазиб олиш фаолияти бўйича катта вице-президенти Хавиер Саинт Мартин Тиллет.

Эслатиб ўтамиз, аввалроқ Париж шаҳрида бўлиб ўтган музокаралар якунида Ўзбекистон Республикаси Президенти Шавкат Мирзиёев ва Франция Республикаси Президенти Эммануэль Макрон Стратегик шериклик ўрнатиш тўғрисидаги қўшма декларацияни қабул қилган эди.