Франция компаниялари Ўзбекистоннинг кичик АЭС лойиҳасида иштирок этиши мумкин

Ўзбекистон Жиззах вилоятида қурилиши режалаштирилаётган кичик қувватли атом электр станцияси (АЭС) лойиҳасида иштирок этиш бўйича учта Франция компанияси билан музокаралар олиб бормоқда. Бу ҳақда “Ўзатом” Атом энергетикасини ривожлантириш агентлиги директори Азим Аҳмедхўжаев “Le Figaro” газетасига берган интервьюсида сўз очди. 

Билдирилишича, Ўзбекистон хорижий ҳамкорларни нафақат технологик тажрибаси, балки молиявий сабаблар туфайли ҳам жалб қилишга қизиқиш билдирмоқда. Шунингдек, Аҳмедхўжаев Францияни энг илғор технологияларни таклиф қилаётган давлатлардан бири сифатида баҳолаган.

Потенциал ҳамкорлар орасида қуйидаги компаниялар номи тилга олинмоқда:

• Assystem – техник ҳамкор;
• Bureau Veritas – мутахассисларни тайёрлаш;
• Framatome – электр станцияларини техник бошқариш.

Таъкидлаш жоиз, “Ўзатом” 2023 йил декабрь ойида Assystem Engineering and Operation Services билан келишув имзолаган.

Франция компаниялари билан музокаралар Ўзбекистон Президенти Шавкат Мирзиёевнинг Францияга давлат ташрифи доирасида фаоллашди. “Le Figaro” нашрининг ёзишича, Франция Ўзбекистоннинг уран конларига катта қизиқиш билдирмоқда.

Эслатиб ўтамиз, 2024 йил май ойида “Ўзатом” ва “Росатом” ўртасида Ўзбекистонда кичик АЭС қуриш бўйича шартнома имзоланганди. Станция Россиянинг РИТМ-200Н реактори асосида барпо этилади (қуввати – 55 МВт, хизмат муддати – 60 йилгача).

Дастлабки реактор беш йил ичида ишга туширилиши, кейингилари эса олти ойлик интервал билан фойдаланишга топширилиши режалаштирилган. АЭС тўлиқ лойиҳавий қувватга 2033 йилдан олдин чиқиши кутилмаяпти.

Ўзбекистон АЭС қуриш учун халқаро консорциум тузишни режалаштириб, Россия, Хитой ва Европа технологияларини жалб этишни кўзламоқда. Бундан ташқари, турбиналар, генераторлар ва совутиш иншоотлари учун халқаро компанияларнинг ускуналарини жалб қилиш масаласи ҳам кўриб чиқилмоқда.