Фолбинга ишониб қабристонга пул кўмган аёл 43 минг долларга “ухлади”

Қирғизистонда аёл фолбин тавсияси билан ўз бизнесига “йўл очиш” учун 43 минг долларни қабристонларга кўмди. Бу ҳақда “Caravan info” хабар берди.

Нашрнинг ёзишича, ички ишлар органларига О.Г. исмли фуқаро мурожаат қилиб, жорий йилнинг май ойидан октябрь ойининг охиригача гумонланувчи аёл “бизнесга ёрдам бериш” баҳонасида турли “маросимлар”ни ўтказиб, унинг ишончига киргани ва фирибгарлик йўли билан 43 минг АҚШ долларини қўлга киритиб, сўнгра яширинганини маълум қилган.

Бишкек шаҳрининг Биринчи май тумани Ички ишлар бўлими ходимлари фирибгарликда гумонланаётган 2000 йилда туғилган М.К. исмли аёлни қўлга олган. Мазкур ҳолат юзасидан Қирғизистон Республикаси Жиноят кодексининг 209-моддаси (фирибгарлик) билан жиноят иши қўзғатилган. Тезкор-қидирув тадбирлари давомида туман ИИБ ходимлари гумонланувчининг шахсини аниқлаб, уни қўлга олган. У вақтинча сақлаш изоляторига жойлаштирилган.

Тергов версиясига кўра, гумонланувчи ўзини фолбин сифатида таништирган. “Маросимлар” пайтида у пулларни қабристонларда қолдиришни талаб қилган, шунингдек ип, игна ва бошқа “сеҳрли буюмлар”дан фойдаланган.

Эслатиб ўтамиз, аввалроқ Замбияда Президентнинг ҳаётига суиқасд қилмоқчи бўлган икки нафар эркак фолбин икки йиллик қамоқ жазосига ҳукм қилинганди.