FIFA футбол федерацияси 2 собиқ президентини умрбод дисквалификация қилди

Халқаро футбол федерацияси (FIFA) Мальдив ороллари ва Монтсеррат футбол федерацияларининг икки собиқ президентини футбол билан боғлиқ ҳар қандай фаолиятдан умрбод четлаштирди. Бу ҳақда FIFA матбуот хизмати хабар берди.

Мальдив ороллари футбол ассоциациясининг (FAM) собиқ президенти Бассам Адил Жалил FIFA’нинг COVID-19 ёрдам дастуридан шахсий манфаатлари йўлида суиистеъмол қилгани учун 1 миллион Швейцария франки (тахминан 1,23 миллион АҚШ доллари) миқдорида жаримага тортилди ва футбол билан боғлиқ барча фаолиятдан четлаштирилди.

Монтсеррат футбол ассоциациясининг собиқ президенти Винсент Касселл ҳам шундай жазога тортилди. У лавозим ваколатларини суиистеъмол қилиш, манфаатлар тўқнашуви, маблағлардан нотўғри фойдаланиш ҳамда федерация ходимларининг жисмоний ва руҳий саломатлигига таъсир қилувчи хатти-ҳаракатларда айбдор деб топилди.

Шунингдек, Касселлга ҳам 1 миллион Швейцария франки миқдорида жарима солинди.