Файзуллаев Франция клубига ўтадими?

ЦСКА клубининг ўзбекистонлик футболчиси Аббосбек Файзуллаевнинг Франциянинг “Монако” клубига ўтиши ҳақиқатдан йироқ. Бу ҳақда футболчи “Sport24” сайтига берган интервьюсида айтди.

“Бу хабар биринчи марта пайдо бўлганида, Мусаев ва Дивеев дарҳол мени масхара қила бошлади ва ота-онам барча қариндошлар уларни табриклай бошлашганини айтди. Шунда мен ҳаммани бу ҳолат ҳақиқатдан йироқ эканига ишонтиришга шошилдим –барча янгиликларни ўзим ҳам интернетдан билиб олдим. “Монако”нинг қизиқиши ҳақида менда ҳеч қандай маълумот йўқ”, дейди Файзуллаев.

Файзуллаев 2023 йилнинг августидан буён ЦСКА сафида тўп сурмоқда. Жорий мавсумда у клуб сафида барча турнирлар доирасида 23 та ўйин ўтказиб, 3 та гол урди ва 6 та голли узатмага муаллифлик қилди. Ўзбекистон миллий терма жамоаси футболчиси ва Россия клуби ўртасидаги амалдаги келишув 2026 йилнинг ёзига қадар мўлжалланган. “Transfermarkt” интернет порталида берилган маълумотларга кўра, футболчининг бозор қиймати 8 миллион еврони ташкил қилади.

Эслатиб ўтамиз, аввалроқ Ўзбекистон терма жамоасининг бошқа бир футболчиси Абдуқодир Ҳусанов яна бир мавсум “Ланс”да қолиши мумкинлиги хабар қилинганди.