Фарғонада “Мансур Казанский” лақаби билан танилган товламачи қўлга олинди (видео)

Фарғона вилоятида “Мансур Казанский” лақаби билан танилган шахс 100 минг АҚШ долларини товламачилик йўли билан олаётган вақтида қўлга олинди. Бу ҳақда вилоят Ички ишлар бошқармаси хабар берди.

Қайд этилишича, у Тошкент шаҳрида яшовчи фуқарога тегишли нотурар жойни 1 миллион 200 минг АҚШ долларига сотиб олишга келишган. Келишувга кўра, объект учун тўлов уни гаровга қўйиш орқали олинадиган банк кредити ҳисобидан амалга оширилиши керак бўлган.

Келишув асосида нотурар жой нотариал тартибда гумонланувчи номига расмийлаштирилган. Шундан сўнг у кредит бўйича ойлик тўловлар ва фоиз ставкалари миқдори билан танишиб, кредит расмийлаштиришдан бош тортган. Бироқ объектни эгасига қайтариб бериш ўрнига товламачиликка ўтган.

Яъни, нотурар жойни жабрланувчининг номига қайта расмийлаштириб бериш эвазига ундан нақд 200 минг АҚШ доллари беришни талаб қила бошлаган. Ушбу ноқонуний ҳаракатларни амалга оширишда 1968 йилда туғилган шахсни ҳам жалб қилган.

Бундан ташқари, у жабрланувчининг тадбиркор шеригига ҳам босим ўтказган. Унга нисбатан қораловчи материаллар тўпланганини, бундан гўёки жиноий жавобгарликка тортиш учун фойдаланишини айтиб, уларни қўрқитган ва руҳий босим ўтказган. Шу тариқа 200 минг АҚШ долларини беришга мажбурлаб келган.

Юқоридагиларга асосан, Фарғона вилояти Ички ишлар бошқармаси ҳамда Давлат хавфсизлик хизмати ходимлари томонидан ҳамкорликда тезкор тадбир ўтказилган.

Тадбир давомида гумонланувчи Фарғона шаҳар Бурҳониддин Марғиноний кўчасидаги нотариал идорада нотурар бинога нотариал тартибда 100 минг АҚШ доллари эвазига товламачилик йўли билан жабрланувчига ўтказиб берган вақтида далилий ашёлар билан қўлга олинган.

Мазкур ҳолат юзасидан Жиноят кодексининг 165-моддаси (Товламачилик) тегишли банди билан жиноят иши қўзғатилган. Жиноятга алоқадор шахслар процессуал тартибда ушланган.

Эслатиб ўтамиз, аввалроқ Тошкентда “Дерсу” лақаби билан танилган безори қўлга олинган эди.