Фарғона аэропортида самолётнинг ғилдираги чиқиб кетди

Кеча, 12 март куни Фарғона халқаро аэропортининг учиш-қўниш йўлагида S7 Airlines'га тегишли Boeing 737-800 (РА-73669) самолёти қолиб кетди. Ушбу ҳаво кемаси Новосибирскдан S7-5561 рейси билан келган бўлган. Бу ҳақда “Авиаторщина” хабар берди.

Қайд этилишича, қўнишдан сўнг юриш давомида самолётнинг чап асосий шасси ташқи ғилдираги блокланиб, чиқиб кетган. Учиш-қўниш йўлагидан бурилиб чиқиш чоғида ҳаво кемаси командири самолётнинг чап томонга тортаётганини сезиб, ҳаракатни тўхтатган ва муҳандис-техник хизмат ходимларини чақирган. Самолёт текширилганида ғилдиракни маҳкамловчи бир нечта болтларнинг йўқлиги аниқланган.

Кўп ўтмай, йўловчилар тўғридан тўғри учиш-қўниш йўлагида туширилган ва улар багажлари билан терминалга етказилган. Boeing 738 эса эксплуатациядан вақтинча четлатилган бўлиб, бир неча соат ўтгач, перронга эвакуация қилинган.

Фарғона аэродроми эса ягона учиш-қўниш йўлаги тўсилиб қолгани сабабли вақтинча парвозлар учун ёпилган. Шу сабабли Utair авиакомпаниясининг V738 рейси – Внуководан Фарғонага йўл олган самолёт Тошкентга қўнишга мажбур бўлган.

S7 матбуот хизматига кўра, Новосибирскдан Ўзбекистонга қайтиш рейсини амалга ошириш учун захира самолёти юборилган.

Эслатиб ўтамиз, аввалроқ Самарқанд-Москва йўналиши бўйича учаётган Россиянинг Utair авиакомпаниясига тегишли Boeing 737 (RA-73091) самолёти баландликка кўтарилаётганда чап двигателида носозлик (кучли силкиниш) кузатилгани сабабли Самарқанд аэропортига қайтган эди.