Farg‘ona aeroportida samolyotning g‘ildiragi chiqib ketdi

Kecha, 12 mart kuni Farg‘ona xalqaro aeroportining uchish-qo‘nish yo‘lagida S7 Airlines'ga tegishli Boeing 737-800 (RA-73669) samolyoti qolib ketdi. Ushbu havo kemasi Novosibirskdan S7-5561 reysi bilan kelgan bo‘lgan. Bu haqda “Aviatorina” xabar berdi.

Qayd etilishicha, qo‘nishdan so‘ng yurish davomida samolyotning chap asosiy shassi tashqi g‘ildiragi bloklanib, chiqib ketgan. Uchish-qo‘nish yo‘lagidan burilib chiqish chog‘ida havo kemasi komandiri samolyotning chap tomonga tortayotganini sezib, harakatni to‘xtatgan va muhandis-texnik xizmat xodimlarini chaqirgan. Samolyot tekshirilganida g‘ildirakni mahkamlovchi bir nechta boltlarning yo‘qligi aniqlangan.

Ko‘p o‘tmay, yo‘lovchilar to‘g‘ridan to‘g‘ri uchish-qo‘nish yo‘lagida tushirilgan va ular bagajlari bilan terminalga yetkazilgan. Boeing 738 esa ekspluatatsiyadan vaqtincha chetlatilgan bo‘lib, bir necha soat o‘tgach, perronga evakuatsiya qilingan.

Farg‘ona aerodromi esa yagona uchish-qo‘nish yo‘lagi to‘silib qolgani sababli vaqtincha parvozlar uchun yopilgan. Shu sababli Utair aviakompaniyasining V738 reysi – Vnukovodan Farg‘onaga yo‘l olgan samolyot Toshkentga qo‘nishga majbur bo‘lgan.

S7 matbuot xizmatiga ko‘ra, Novosibirskdan O‘zbekistonga qaytish reysini amalga oshirish uchun zaxira samolyoti yuborilgan.

Eslatib o‘tamiz, avvalroq Samarqand-Moskva yo‘nalishi bo‘yicha uchayotgan Rossiyaning Utair aviakompaniyasiga tegishli Boeing 737 (RA-73091) samolyoti balandlikka ko‘tarilayotganda chap dvigatelida nosozlik (kuchli silkinish) kuzatilgani sababli Samarqand aeroportiga qaytgan edi.