Эронда заҳарланган қизлар ортидан 100 дан ортиқ киши ҳибсга олинди

Эронда ўқувчи қизларнинг заҳарланишига алоқадорликда гумон қилинган 100 дан ортиқ киши қўлга олинди. Бу ҳақда мамлакат Ички ишлар вазирлигига таяниб, IRNA агентлиги хабар берди.

Қайд этилишича, қўлга олинганлар орасида аҳоли ва талабаларни даҳшатга солиш, мактабларни ёпиш ҳамда Эронга нисбатан шубҳа уйғотмоқчи бўлган ғараз ниятли одамлар бор.

Мамлакат олий раҳбари Оятуллоҳ Али Ҳоманаий талабаларнинг заҳарланиши муаммосига жиддий эътибор қаратишга чақирган. У содир бўлган воқеа кечирилмас жиноят эканини ва айбдорлар қаттиқ жазоланиши кераклигини таъкидлаган.

Расмийларнинг фикрича, ўқувчи қизлар қандайдир заҳарли моддадан заҳарланган. Ҳужумда “Теҳрон душманлари” айбланмоқда.

Маълумот учун, Эронда бундай ҳолат 2014 йилда ҳам содир бўлган. Ўшанда исломий кийиниш қоидаларини бузган аёлларни қўрқитиш учун кислотали ҳужумлар уюштирилган. Бундан норози халқ эса Исфахонда кўчага чиққан. 2022 йил сентябрда Маҳса Амини ўлимидан сўнг бутун мамлакатни қамраб олган норозилик намойишларидан кейин мактабларда газдан заҳарланиш ҳолати кузатилгани вазиятни янада чигаллаштирган.

Эслатиб ўтамиз, Эронда ноябрь ойидан бери минглаб ўқувчи қизлар газдан заҳарлангани айтилганди. Эрон Соғлиқни сақлаш вазири сўнгги ойларда турли мактабларда ўқиётган қизлар заҳарли ҳужумга учраганини тасдиқлаган. Баъзи сиёсатчилар эса ҳолат қизларнинг таълим олишига қарши бўлган диний гуруҳлар томонидан уюштирилганини тахмин қилмоқда.