Эронда “Моссад” учун жосуслик қилган эркак қатл этилди

Кеча, 30 апрель куни эрталаб Эрон Олий суди ҳукми билан Исроил махсус хизмати билан ҳамкорлик қилганликда айбланган Моҳсен Лангарнешин қатл этилди. Бу ҳақда мамлакат адлия идорасига таяниб, “PressTV” хабар берди.

Баёнотга кўра, Лангарнешин 2020 йилнинг кузида “Моссад” билан ҳамкорликни бошлаган, махсус тайёргарликдан ўтган ва ўша йилнинг декабрида биринчи топшириқни бажарган. Тергов материалларига кўра, у икки йил давомида Исроил разведкаси ходимлари ва агентлари билан Эрон ҳудудида фаол алоқада бўлган, шунингдек, 2022 йил 22 май куни Эрон Ислом инқилоби қўриқчилари корпуси полковниги Ҳасан Сайёд Ходайининг ўлдирилишида иштирок этган.

Баёнотда таъкидланишича, Лангарнешин тергов давомида айбини тан олган. Суд вакиллари унинг “Моссад” фойдасига олиб борган жосуслик фаолияти, террорчи гуруҳларни қўллаб-қувватлагани, шунингдек, Исроил разведкаси билан алоқа учун фойдаланилган махфий коммуникация линияси аниқланганини маълум қилган.

“Лангарнешин ўз кураторлари топшириғига биноан муайян объектларни суратга олган, Исроил томонига аноним сим-карталар, мобил телефонлар ва бошқа алоқа воситаларини топширган”, дейилади ҳужжатда.

У Исроил разведкаси вакиллари билан учрашиш учун Непал ва Грузияга ҳам чиққани маълум қилинган.

Эслатиб ўтамиз, аввалроқ Туркия Миллий разведка ташкилоти ва Истанбул Бош прокуратураси ҳамкорлигида олиб борилган тадбир натижасида Эрон разведка хизмати фойдасига жосуслик қилгани аниқланган 5 киши қўлга олинганди. Эрон Ислом инқилоби қўриқчилари корпусининг разведка ходимлари билан алоқада бўлгани маълум бўлган гумонланувчилар Туркиядаги ҳарбий базалар ва муҳим стратегик ҳудудлар, шунингдек, хориждаги аҳамиятли жойларга оид маълумотларни қўлга киритиб, уларни Эрон разведкасига етказиб бергани аниқланган.