Эронда интернет тўлиқ ўчирилди

Эрон бўйлаб интернет деярли тўлиқ ўчирилди. Бу ҳақда NetBlocks халқаро интернет мониторинг хизмати Х саҳифасида хабар берди.

Ҳодиса бир неча олдинги қисман узилишлар ортидан юз берди ва бир неча кунлик ракета ҳужумларидан сўнг Исроил билан ҳарбий зиддият кучайган бир пайтга тўғри келди. 

NetBlocks қайд этишича, бунгача республикада Исроил билан зиддият кучайиши фонида кичикроқ носозликлар бўлган. 13 июндан, яъни Исроил операцияси бошланганидан бери хизмат тақдим этган графикга кўра, интернет мавжудлиги 60 фоиздан пастга тушмаган. Энди графикдаги чизиқ деярли нолга яқин.

Кейинроқ Эрон Алоқа вазирлиги Исроилнинг тармоқдан фойдаланиши сабабли расмийлар интернетни вақтинча чеклаётганини маълум қилди.

“Босқинчининг мамлакат алоқа тармоғидан ҳарбий мақсадларда фойдаланиши ҳамда одамларнинг ҳаёти ва мулкига таҳдид солиши муносабати билан ваколатли органлар қарори асосида фойдаланувчиларнинг интернет тармоғига киришига вақтинчалик чекловлар жорий этилди”, дея хабар беради ISNA.

Вазирликнинг таъкидлашича, мамлакат ичида хизматлар кўрсатувчи платформаларга кириш имкони сақланиб қолган. Йирик носозликлардан бири 17 июнь куни қайд этилган. 13 июнь куни Алоқа вазирлиги мамлакатда “махсус шартлар туфайли” интернетга киришга чекловлар киритилгани ҳақида хабар берган эди. Вазият барқарорлашганда уларни олиб ташлашга ваъда беришди.

Эслатиб ўтамиз, аввалроқ АҚШ Президенти Дональд Трамп матбуот анжуманидаги чиқиши чоғида Исроил Бош вазири Биньямин Нетаньяхуга ҳар куни қўнғироқ қилишини айтди. Трампга кўра, у Исроил Бош вазирига кўпроқ ҳарбий ёрдам беришга тайёр эмаслигини қўшимча қилган.