Эрон ва Сурия билан уруш тугамади – Исроил

Исроил армияси Сурия ва Ливандаги “Ҳизбуллоҳ” ҳаракатининг стратегик имкониятларини орттиришига тўсқинлик қилишда, Сурияда ўз ҳаракатларини сақлашда ва Эрон билан курашишда давом этади. Бу ҳақда мамлакат Қуролли кучлари Бош штаби бошлиғи, генерал-лейтенант Эяль Замир томонидан берилган баёнотда маълум қилинди.

Замир деярли икки йил ичида илк бор юқори ҳарбий раҳбарият билан биргаликда бир нечта фронт бўйича ҳолатни тўлиқ баҳолаб чиққан. Исроил чегараларидаги ва бутун Яқин Шарқдаги вазият бўйича разведка маълумотлари, оператив ҳолат ва стратегик баҳолар тақдим этилган. Замир Исроил армиясининг кенг қамровли қуролли можаро учун доимий тайёрлигини таъминлаш зарурлигини таъкидлаган. 

“Биз ҳаводаги устунлигимизни сақлаб қоламиз ва разведка имкониятларимизни ривожлантиришда давом этамиз”, деган генерал-лейтенант. 

Унинг таъкидлашича, Исроил Сурия ва Ливандаги “Ҳизбуллоҳ”нинг стратегик салоҳиятини кучайтиришига тўсқинлик қилишда давом этади, шунингдек, Сурияда ўз ҳаракат эркинлигини ҳимоя қилиш учун амалиётларни давом эттиради.

“Ғазо секторидаги уруш – Исроил армияси дуч келган энг мураккаб урушлардан бири. Биз бу уруш учун юқори нарх тўлаяпмиз”, дея қўшимча қилган Қуролли кучлари Бош штаби бошлиғи.

Замир, шунингдек, Эрон масаласига ҳам тўхталган. 

“Эрон ва унинг иттифоқчилари ҳали-ҳануз бизнинг нишонларимиз бўлиб қолмоқда. Эрон билан уруш ҳали якунланмаган”, деган генерал-лейтенант.

Бундан ташқари, у Исроил армияси Иордан дарёсининг ғарбий соҳилидаги босиб олинган ҳудудларда ҳам амалиётларини давом эттираётганини билдирган.

Эслатиб ўтамиз, икки давлат ўртасида оташкесим эълон қилинса-да, 21 июль куни Исроил ҳарбий-ҳаво кучларининг қирувчи самолётлари Сурия жанубидаги Сувайда ва Дараа вилоятлари чегарасида араб қабилавий кучларининг позицияларига ҳужум қилганди.