Эрон ва “Ҳизбуллоҳ” бир вақтнинг ўзида Исроилга зарба берди (видео)

Эрон ва Ливан биринчи марта бир вақтнинг ўзида Исроил ҳудудига зарба берди. Бу ҳақда Эроннинг “Tasnim” агентлиги хабар берди.

Маълум қилинишича, Эрон ва “Ҳизбуллоҳ” илк бор бир вақтнинг ўзида  Исроилга ҳужум қилган.

“The Times of Israel” нашрининг хабар беришича, Теҳрон томонидан баллистик ракеталар учирилгани ортидан Исроилнинг қатор ҳудудларида, жумладан Тель-Авив шаҳрида хавф сиреналари янграган. Исроил мудофаа армияси ҳаво ҳужумидан мудофаа тизимлари Эрон ракеталарини тутиб қолиш учун ишга туширилганини маълум қилган.

Қайд этиш жоиз, “Ҳизбуллоҳ” Эрон томонидан қўллаб-қувватланади. Гуруҳ асосан Ливаннинг жанубий ҳудудларини назорат қилади, унинг штаб-квартираси Байрут шаҳрида жойлашган. Ливан расмийлари эса мамлакатни минтақадаги можарога тортишни истамасликларини бир неча бор таъкидлаган.

1 мартдан 2 мартга ўтар кечаси Исроил мудофаа армияси Ливан томонидан снарядлар учирилиши ортидан сиреналар янграганини ва улардан бири тутиб қолинганини хабар қилди. Яна бир нечта снаряд очиқ ҳудудларга тушган. Исроил армияси маълумотига кўра, яраланганлар ва вайронгарчиликлар ҳақида хабар келиб тушмаган.

Кейинроқ Исроил томони Байрут ҳудудида “Ҳизбуллоҳ”нинг юқори лавозимли аъзоларига қарши аниқ зарбалар берилганини билдирган. ОАВнинг ёзишича, ҳужум оқибатида Ливан парламентидаги “Қаршиликка садоқат” блоки раҳбари Муҳаммад Раад ҳалок бўлган.

АҚШ–Исроил–Эрон уруши

Кеча, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига “иммунитет” олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.

Аввалроқ, Эрон давлат телевидениеси Хоманаий Исроил ва АҚШ томонидан ўлдирилганини хабар қилган эди. Эроннинг “Tasnim” ахборот агентлиги маълумотларига кўра, у кеча, 28 февраль куни эрталаб ўз ишхонасида ўлдирилган. Оятуллоҳнинг вафоти муносабати билан мамлакат бўйлаб 40 кунлик умумхалқ мотами ва 7 кунлик умумхалқ дам олиш кунлари эълон қилинди.

Шунингдек, Эрон ҳудудига уюштирилган ҳужум чоғида Оятуллоҳнинг оила аъзоларидан тўрт киши – қизи, куёви, набираси ва келинларидан бири ҳам ҳалок бўлган.

Қайд этиш жоиз, Эрон Ислом инқилоби қўриқчилари корпуси Ислом Республикаси Олий раҳбари Оятуллоҳ Али Хоманаийнинг вафоти тасдиқланганидан сўнг, мамлакат “Қуролли кучлари тарихидаги энг шиддатли ҳужум операцияси” бошланганини маълум қилганди.

Шундан сўнг, Эрон Ислом инқилоби қўриқчилари корпуси мамлакат Исроил ва АҚШга қарши янги ҳужумлар бошланганини эълон қилди.