Эрон Президенти ўз маошини мактаб қурилишига хайрия қилди

Эрон Президенти Масъуд Пезешкиён ўз маошини миллий мактаб қурилиши кампаниясига хайрия қилди ва ваъдасини 48 соатдан камроқ вақт ичида бажарди. Бу ҳақда Мактабларни таъмирлаш, ривожлантириш ва жиҳозлаш бўйича миллий ташкилот раҳбари Реза Хонмуҳаммадий SNNTV телеканалида эълон қилди.

Хонмуҳаммадийнинг сўзларига кўра, Президент 30 октябрь куни қурилиш саноати вакиллари ва донорлар билан учрашувда ўз ойлигидан тушаётган маблағларнинг бир қисмини мактаб қурилишига сарфлашга ваъда берган. Расмий депозит варақаси билан тасдиқланганидек, ўтказиш 1 ноябрь куни амалга оширилган.

Масъуд Пезешкиён 2024 йилнинг июль ойи бошида Эрон Президенти бўлди. Сиёсатга киришдан олдин у юрак жарроҳи бўлиб ишлаган.

Жорий йилнинг куз ойларида Эронда “Мактаб қуринг” лойиҳаси старт олди. Ўшанда Президент ойлик маошини таълим муассасалари қурилишига хайрия қилишини эълон қилди. Лойиҳа фуқароларни мактабларни қуриш ва таъмирлашда ҳам молиявий, ҳам бошқа хайриялар орқали иштирок этишга ундашга қаратилган.

Эслатиб ўтамиз, аввалроқ Масъуд Пезешкиённинг Табризга қилган норасмий сафари чоғида унинг кортежидаги учта машина ҳам бузилиб қолганди. Шу пайтда Пезешкиён маҳаллий ҳокимиятни жалб қилмасликни маъқул кўрган ва Табризга саёҳатини якунлаш учун шахсий такси ташкил қилган.