Eron Prezidenti benzin muammosi sabab manziliga taksida bordi

Eron Prezidenti Mas’ud Pezeshkiyonning yaqinda Tabrizga qilgan norasmiy safari chog‘ida uning kortejidagi uchta mashina ham buzilib qoldi. Bu haqda Prezidentning maxsus inspektori Mustafo Mavlaviyga tayanib, “Iran International” xabar berdi.

Davlat rahbari va uning xavfsizlik karvonini olib ketayotgan uchta mashina ham yo‘l bo‘yidagi yoqilg‘i quyish shoxobchasida benzin quygandan so‘ng, Qazvin viloyatidagi Takestan shahri yaqinida to‘xtab qolgan.

“Bizning tekshiruvimiz shuni ko‘rsatdiki, stansiya suvga aralashgan sifatsiz benzin tarqatgan”, deydi Mavlaviy.

Uning aytishicha, Pezeshkiyon mahalliy hokimiyatni jalb qilmaslikni ma’qul ko‘rgan va Tabrizga sayohatini yakunlash uchun shaxsiy taksi tashkil qilgan.

“Prezident viloyat gubernatorligiga qo‘ng‘iroq qilmagan yoki yordam so‘ramagan. U shunchaki taksiga o‘tirgan”, deya yozadi nashr.

Eron neft mahsulotlarini tarqatish milliy kompaniyasi (NIOPDC) ko‘rib chiqilayotgan yoqilg‘i quyish shoxobchasi yoqilg‘i sifati bilan bog‘liq muammolar yuzasidan unga nisbatan ilgari shikoyat qilinganini tasdiqlagan. Biroq, qonunbuzarliklar sodir bo‘lganiga qaramay, ob’ekt nima uchun haliyam ishlayotgani haqida hech qanday izoh berilmagan.

Mustafo Mavlaviyga ko‘ra, ushbu yoqilg‘i quyish shoxobchasida shunga o‘xshash muammolar avval ham kuzatilgan.

Prezident devoni ham, Neft vazirligi ham voqea yuzasidan ochiqchasiga izoh bermagan.

Eslatib o‘tamiz, avvalroq Eronning marhum prezidenti Ibrohim Raisiyning onasi Prezident Mas’ud Pezeshkiyonga vertolyotlarga chiqmaslikni tavsiya qilgandi.