Эрон Президенти Трамп билан учрашишдан бош тортди

Эрон Президенти Масъуд Пезешкиён икки мамлакат ўртасидаги ишонч қайта тикланмагунича америкалик мавқедоши Дональд Трамп билан учрашув ўтказмайди. Бу ҳақда Эрон раҳбарининг ўзи CBS телеканали журналистининг саволига жавобан маълум қилди.

Мухбир Эрон Президентидан Оқ уй эгасини Теҳронга музокараларга таклиф қила олиши ёки олмаслиги ҳақида сўраган.

“Қаранг, аввало, сиз Эрондаги вазият қандай эканини биласиз. Уларнинг (америкаликларнинг) бизга ва халқимизга қилган ишлари одамларни жуда хафа қилди”, дейди Пезешкиён.

Эрон етакчиси сиёсий нуқтаи назардан унинг Трамп билан учрашувини ташкил этиш жуда қийинлигига эътибор қаратган. Теҳрон учун Вашингтонга ишониш мураккаб ва бу масала ҳал бўлмагунича, олий даражадаги музокаралар бўлмайди.

Эслатиб ўтамиз, жорий йилнинг 18 июнь куни АҚШ ва Эрон вақтинчалик ўзаро англашув меморандумини тузган эди, бироқ орадан атиги бир неча кун ўтиб, томонлар бир-бирига ўт очишни давом эттирди. Аввалроқ, Дональд Трамп Эроннинг Ҳормуз бўғозини қайта очиш ва минтақадаги жангларни етти кун ичида тўхтатишни назарда тутган тинчлик таклифини рад этгани маълум бўлди.