Эрон Хитойнинг босими сабаб сулҳга рози бўлди – ОАВ

Эрон АҚШ билан икки ҳафталик ўт очишни тўхтатиш келишувига Покистоннинг дипломатик саъй-ҳаракатлари ва Хитойнинг Теҳронга қилган босими ортидан рози бўлди. Бу ҳақда ўз манбаларига таяниб, “The New York Times” нашри хабар берди.

Қайд этилишича, Покистон фаол равишда сулҳни илгари сурган, Хитой эса сўнгги дақиқаларда Теҳронни мослашувчан бўлишга ва кескинликни камайтиришга чақирган. Бундан ташқари, муҳим инфратузилмага етказилган иқтисодий зарар ҳам Эроннинг ушбу қарорни қабул қилишига таъсир кўрсатган.

Нашрнинг ёзишича, оташкесим Эроннинг янги Олий раҳбари Оятуллоҳ Мужтабо Хоманаий томонидан маъқулланган. 

Қизиқарли жиҳати шундаки, бундан уч ҳафта олдин Трамп Эрон “тез орада таслим бўлади” деб баёнот берган эди, бироқ ҳозир Вашингтон сулҳга рози бўлмоқда. Ҳозирча Хитой ушбу музокараларга аралашганини расман тасдиқламаган. 

Эслатиб ўтамиз, аввалроқ АҚШ ва Эрон икки ҳафталик сулҳга эришганди. Сулҳни АҚШ Президенти Дональд Трампнинг шахсан ўзи эълон қилган. Шунингдек, Покистон Бош вазири Шаҳбоз Шариф Эрон ва АҚШ рози бўлган ўт очишни тўхтатиш “Ливанда ва ҳамма жойда” амал қилиши кераклигини айтган.

Сулҳ эълон қилингач, Эрон Олий миллий хавфсизлик кенгаши мамлакат урушда “ғалаба қозонганини” билдирган. Уларнинг талқинига кўра, АҚШ Теҳрон илгари сурган 10 бандли таклифни қабул қилган, жумладан Ҳормуз бўғози устидан назоратни Эронда қолдириш талаби ҳам мавжуд.