Эрон Исроилни сулҳни бузганликда айблади

Эрон Ташқи ишлар вазири Аббос Ароқчи Покистон армияси қўмондони Осим Мунир билан телефон орқали мулоқотда Исроил томонидан сулҳнинг бузилишини муҳокама қилди. Бу ҳақда мамлакат Ташқи ишлар вазирлиги хабар берди.

“Исроилнинг Эрон ва Ливанда ўт очишни тўхтатиш режимини бузиш ҳолатларини муҳокама қилдик”, дейилади вазирлик баёнотида.

Қайд этиш жоиз, Эрон ва АҚШ ўртасида ўт очишни тўхтатиш эълон қилинганидан сўнг Исроил армияси ҳам ҳужумларни тўхтатишини маълум қилган эди, бироқ “Ҳизбуллоҳ” ҳаракатига қарши операциясини давом эттирди. Исроил мудофаа армияси (ЦАХАЛ) ҳозирги кескинлик бошланганидан бери Ливандаги объектларга энг йирик зарбалар серияси берилганини эълон қилди. Авиация ва артиллерия мамлакат жанубидаги ўндан ортиқ аҳоли пунктларига зарба берди, ҳалок бўлганлар ва яраланганлар борлиги хабар қилинди.

Шу билан бирга, ОАВ хабарларига кўра, Исроил америкаликлар билан биргаликда Эрон жанубидаги нефтни қайта ишлаш заводига зарбалар берган.

Кеча, 7 апрель куни АҚШ Президенти Дональд Трамп Эрон билан икки ҳафталик ўзаро ўт очишни тўхтатиш бўйича сулҳга эришилганини эълон қилди. Америка етакчисининг аниқлик киритишича, ушбу қарор Покистон Бош вазири Шаҳбоз Шарифнинг таклифи ҳамда “Эрон Ислом Республикасининг Ҳормуз бўғозини тўлиқ, зудлик билан ва хавфсиз тарзда очишга тайёрлиги” инобатга олинган ҳолда қабул қилинган. Эрон давлат телевидениесининг хабар беришича, Теҳрон ўт очишни тўхтатиш бўйича 10 та шартни илгари сурган ва АҚШ “уларга рози бўлишга мажбур бўлган”. Улар орасида ҳужум қилмаслик тамойили, Теҳроннинг Ҳормуз бўғози устидан назорати, Эрон ҳудудида уранни бойитиш, асосий ва иккиламчи санкцияларни бекор қилиш, товон пули тўлаш, Америка кучларини минтақадан олиб чиқиб кетиш каби шартлар бор. Шариф Эрон ва АҚШ делегацияларини “барча низоларни ҳал қилиш бўйича якуний келишувга эришиш” учун 10 апрель куни Исломободга музокаралар столига таклиф қилди. CNN телеканали хабарига кўра, Америка делегацияси таркибидан вице-президент Жей Ди Венс, президентнинг махсус элчиси Стив Уиткофф ва Трампнинг куёви Жаред Кушнер ўрин олади.