Эрон Исроил фойдасига жосусликда айбланган эркакни қатл этди

Бугун, 20 декабрь куни Эрон Исроил фойдасига жосуслик қилганликда ва Эрон мухолифат гуруҳлари билан алоқаларда айбдор деб топилган эркакни қатл этди. Бу ҳақда “Reuters” ахборот агентлиги хабар берди.

Қайд этилишича, Исроил билан ўнлаб йиллардан бери давом этиб келаётган яширин қарама-қаршилик фонида Эрон мамлакат ичида Исроил разведка хизмати билан алоқадорликда ва унинг операцияларига кўмаклашганликда айбланган кўплаб шахсларни қатл этган.

Норвегиянинг Осло шаҳрида жойлашган “Iran Human Rights” ташкилоти Х тармоғида қатл этилган шахсни 27 ёшли архитектура йўналишида таҳсил олувчи талаба Ақил Кешаварз, деб таништирган ва у Исроил фойдасига жосуслик қилиш билан боғлиқ айбловлар бўйича “қийноқ остида олинган иқрорлар” асосида ўлим жазосига ҳукм қилинганини маълум қилган.

Маълумот учун, Эрон-Исроил можароси июнь ойида уруш босқичига ўтган. Ўшанда Исроил Эрон ҳудудидаги турли нишонларга зарбалар берган, жумладан, Моссад командолари мамлакат ичкарисида жойлаштирилган операцияларга таянган ҳолда ҳаракат қилгани айтилган.

Бу йил Исроил фойдасига жосусликда айбдор деб топилган эронликларнинг қатл этилиши кескин кўпайган, сўнгги ойларда бир нечта ўлим жазолари ижро этилган.

Эслатиб ўтамиз, аввалроқ Эроннинг Қум шаҳрида Исроил разведка агентлигига жосуслик қилишда айбланган шахс қатл қилинганди.