Эрон Исроил билан урушга тайёр – Пезешкиён

Эрон Президенти Масъуд Пезешкиён мамлакати Исроил билан янги урушга тайёр эканини эълон қилди. Бу ҳақда у “Al Jazeera” телеканалига берган интервьюсида сўз очди.

Пезешкиён 12 кунлик тўқнашувдан сўнг эълон қилинган сулҳга ортиқ ишонмаслигини билдирган.

“Эрон Қуролли кучлари Исроил ҳудудининг ичкарисигача зарба бера олади”, деган мамлакат Президенти. 

Унинг сўзларига кўра, АҚШ томонидан ядро объектларига уюштирилган зарбаларга қарамасдан, уранни бойитиш дастури давом эттирилади, бу жараён эса халқаро ҳуқуқ доирасида олиб борилади.

“Бизнинг технологияларимиз биноларда эмас, олимларимизнинг онгидадир”, дея таъкидлаган Пезешкиён. 

Шунингдек, у АҚШ Президенти Дональд Трампнинг “Эрон ядро дастури йўқ қилинди”, деган даъволарини рад этган ҳамда Эрон музокараларга очиқлигини, аммо “таҳдид ва босим”ни ҳеч қачон қабул қилмаслигини айтган. 

Пезешкиён 15 июнь куни ўзига қилинган суиқасдга ҳам тўхталиб, бу ҳужум Исроилнинг Эрон сиёсий раҳбариятини издан чиқариш режаси доирасида амалга оширилганини таъкидлаган.

Шунингдек, Қатардаги АҚШ ҳарбий базасига берилган ракета зарбаси ҳақида ҳам гапириб, бу зарба Қатарга қарши эмаслиги, бу борада у Қатар амири Тамим бин Ҳамадга шахсан тушунтириш берганини маълум қилган. 

Эрон вакиллари эртага, 25 июль куни Истанбулда Англия, Франция ва Германия дипломатлари билан учрашиб, Эрон ядро дастури бўйича музокаралар ўтказади.  Бу учрашув Эрон ва Исроил ўртасида ўтган ой 12 кунлик қарама-қаршилик бўлиб, АҚШ Теҳроннинг ядровий объектларига ҳужум қилганидан бери биринчи учрашувдир.

Эслатиб ўтамиз, аввалроқ Эрон Ташқи ишлар вазири Аббос Ароқчи ҳам АҚШнинг Эрон ядро иншоотларига зарба беришига қарамай, Теҳрон уранни бойитишдан воз кечмаслиги ҳақида гапирганди. ТИВ раҳбарининг сўзларига кўра, “зарар жиддий ва оғир” бўлгани учун бойитиш тўхтатилган.