Иқтисоди “ўтириб” бораётган Эрон аламидан АҚШни кескин огоҳлантирди

Эрон АҚШнинг санкциялари ва ҳарбий босими туфайли юзага келган иқтисодий муаммоларни ҳал қилиш чораларини кучайтиришини маълум қилди. Шу билан бирга, Теҳрон АҚШ томонидан янги ҳужумлар амалга оширилса, жавоб зарбалари янада оғир бўлишидан огоҳлантирди. Бу ҳақда “Reuters” хабар берди.

Қайд этилишича, Эрон парламенти спикери Муҳаммад Боқир Ғолибоф мамлакатнинг эҳтимолий янги таҳдидларга жавоб бериш стратегияси ўзгараётганини билдириб, бундан кейинги жавоблар тезроқ ва кучлироқ бўлишини айтган.

Теҳрон, шунингдек, стратегик аҳамиятга эга Ҳормуз бўғози яқинида чекланган ҳудуд жорий этишни режалаштирмоқда. У ерга рухсатсиз кирган кемаларга нисбатан чоралар кўрилиши мумкин.

Эрон иқтисодиётига АҚШ санкциялари ва нефть экспортига қўйилган чекловлар жиддий таъсир кўрсатмоқда. Мамлакатнинг нефть сотуви кескин қисқаргани хорижий валюта тушумлари, давлат даромадлари ва таъминот занжирларига босимни кучайтирган.

Эрон Иқтисодиёт вазири Али Мадани Зода иқтисодий ислоҳотлар мамлакатнинг ўзи томонидан амалга оширилишини ва ташқи кучларнинг аралашуви қабул қилинмаслигини таъкидлаган.

Айни пайтда Эроннинг Иқтисодий уруш штаби уруш ва санкциялар оқибатларини юмшатиш, ички бозорни таъминлаш ҳамда иқтисодий барқарорликни сақлаш бўйича чораларни кучайтирмоқда.

Теҳрон маълумотларига кўра, нефть саноати учун муҳим бўлган Харк ороли 550 мартадан ортиқ зарбага учраганига қарамай, ҳозир ҳам ишламоқда.

Маълумот учун, Эрон ва АҚШ ўртасидаги қарама-қаршилик февраль ойи охирида АҚШ ва Исроилнинг Эронга қарши зарбалари бошланганидан кейин кескинлашган. Июнда вақтинчалик сулҳ эълон қилинган бўлса-да, кейинчалик томонлар ўртасида ўзаро зарбалар яна тикланди.

Эслатиб ўтамиз, сўнгги кунларда АҚШ Эрон танкерларига зарбалар берганини маълум қилди, Теҳрон эса АҚШ ҳарбий-денгиз кучларига қарши ҳужумлар уюштирди. Ҳормуз бўғози атрофидаги кескинлик жаҳон нефть бозорига ҳам таъсир кўрсатмоқда: Brent нефти нархи 96 доллардан ошди.