Эрдўған НАТО саммитидан кейин кўплаб табриклар олганини айтди

Туркия Президенти Ражаб Тойиб Эрдўған Анқарада ўтказилган НАТО саммитидан сўнг кўплаб давлат раҳбарларидан миннатдорлик телефонлари ва табрик телеграммаларини олганини маълум қилди. Бу ҳақда у кеча, 24 июль куни Ҳазрати Али масжидида жума намозидан кейин журналистлар билан суҳбатда айтди.

Эрдўғаннинг сўзларига кўра, саммит иштирокчилари Туркиянинг мезбонлик даражасини юқори баҳолаган.

“НАТО саммити бўйича қайтган фикрлар жуда ижобий бўлди. Биз доимий равишда миннатдорлик телеграммалари ва телефон қўнғироқларини олдик. Айниқса, очилиш кунида меҳмонларга кўрсатилган эҳтиром ва меҳмондўстлик уларда катта таассурот қолдирди”, деган у.

Унинг таъкидлашича, Дональд Трамп бошчилигидаги кўплаб етакчилар саммит давомида ҳам, ундан кейин ҳам Туркияга миннатдорлик билдирган. Турмуш ўртоқлари билан ташриф буюрган меҳмонлар ҳам алоҳида ташкил этилган дастурлар ва қабулдан мамнун бўлган.

Эрдўған Анқарада ўтказилган саммитни Туркия учун тарихий воқеа деб баҳолаган. Унинг қайд этишича, бундан аввал НАТО саммитига Истанбул 20 йил олдин мезбонлик қилган, эндиликда эса Анқара халқаро тадбирни муваффақиятли ўтказишга эришган.

“Биз бу қувончни икки марта бошдан кечирдик ва бундан жуда хурсандмиз”, деган Эрдўған.

Бундан ташқари, Эрдўған футбол мавзусига ҳам тўхталиб, Испаниянинг футбол бўйича жаҳон чемпионатидаги ғалабаси ҳақида фикр билдирган. Эрдўғаннинг таъкидлашича, Санчес учун бу энг табиий ва ҳақли ҳолат. Чунки у жаҳон чемпиони бўлган мамлакат Бош вазири сифатида бу қувончни бошдан кечирмоқда.

“Умид қиламанки, биз ҳам шундай жаҳон чемпионатига эришамиз. Биз яхши бошладик, аммо якуни яхши бўлмади. Умид қиламанки, келажакда Европа чемпионатларига эга бўламиз. Ким билади, балки ундан ҳам кўпроқ жаҳон чемпионатларига. Агар биз бундай ютуқларга эриша олсак, бу, албатта, Туркияга жуда мос келади. Умид қиламанки, биз бунга тайёрмиз”, деган Туркия Президенти.

Маълумот учун, жорий йилнинг 7–8 июль кунлари Туркия пойтахти Анқарада НАТОга аъзо давлатлар раҳбарларининг саммити бўлиб ўтган эди. Шунингдек, Туркия Президенти Ражаб Тойиб Эрдўған Анқарада бўлиб ўтган НАТОнинг 36-саммити якунида альянс етакчиларига уларнинг исми ўйиб ёзилган махсус ишлаб чиқарилган тўппонча ҳамда бир қути ўқ-дорини совға қилганди.

Эслатиб ўтамиз, аввалроқ Туркия Президенти Ражаб Тойиб Эрдўған Буюк Британия Қироли Чарлз IIIнинг Кембриж марказий масжидига ташрифини “жуда аҳамиятли” деб атагани ҳақида хабар берилган эди.