Эрдўған эртага Путин билан гаплашиб олмоқчи (видео)

Туркия Президенти Ражаб Тойиб Эрдўған эртага, 24 ноябрь куни Россия Президенти Владимир Путин билан телефон орқали суҳбатлашишни режалаштираётганини маълум қилди. У бу ҳақда Жанубий Африкада G20 саммитида доирасида ўтказган матбуот анжуманида гапирган. 

“Бу ҳафта жаноб Владимир Зеленский менинг меҳмоним эди. Эртага мен жаноб Путин билан телефон орқали суҳбатлашаман. Албатта, бу ерда (G20 саммитида) бўлиб ўтган икки томонлама учрашувларимиз давомида биз Россия ва Украина ўртасидаги урушни батафсил муҳокама қилдик, вазиятни баҳоладик ва нима қила олишимизни кўриб чиқдик. Биз тинчликка қандай эришишга қатъий эътибор қаратдик”, дейди у.

Туркия раҳбари Путин билан суҳбатда дон йўлаги шартномасини қайта тиклаш масаласини кўтариш ниятида эканлигини билдирган. 

“Биз илгари дон йўлаги бўйича таниқли ташаббусга эга эдик. Бу ташаббус ҳақиқатан ҳам тинчликка йўл очишга қаратилган эди. Биз дон йўлаги Европа ва Африкага етиб боришини хоҳладик. Афсуски, фақат чекланган муваффақиятга эришдик. Эртага музокаралар давомида мен жаноб Путиндан бу ҳақда яна сўрайман. Ўйлайманки, агар биз бу жараённи бошласак, бу яхши натижа бўлади”, дейди у. 

Эрдўғаннинг қўшимча қилишича, Путин билан суҳбати давомида у одамларнинг ўлимини тўхтатиш учун қандай чоралар кўриш мумкинлигини муҳокама қилиш ниятида. Шунингдек, давлат раҳбари Путин билан музокаралардан сўнг, натижаларни ҳам европаликлар мавқедошлари, ҳам АҚШ Президенти Дональд Трамп билан муҳокама қилиш имкониятига эга бўлиша умид билдирган.  

“Тўрт йил ўтди ва бу тўрт йил ичида юз минглаб одамлар ҳалок бўлди. Россия ва Украина томонларида кўпчилик ҳалок бўлди. Туркия ўлароқ биз бу воқеаларни чуқур қайғу билан кузатмоқдамиз. Биз бу вазиятни тезроқ ҳал қилишга интиламиз ва умид қиламизки, шунда тинчликка имкон қадар тезроқ эришилади”, дейди Туркия Президенти.