Энергетика тизимига янги вазир тайинланди

Шерзод Хикматуллаевич Хўжаев Ўзбекистон Республикаси Энергетика вазири лавозимига тайинланди. Бу ҳақда бугун, 27 июль куни Президент Шавкат Мирзиёевнинг тегишли фармони имзоланди.

Шерзод Ходжаев собиқ Энергетика вазири Жўрабек Мирзамаҳмудовнинг ўрнига тайинланди ва шу муносабат билан Ўзбекистон Республикаси Энергетика бозорини ривожлантириш ва тартибга солиш агентлиги директори лавозимидан озод этилди.

Қайд этилишича, бундан илгарироқ Хўжаев номзоди Олий Мажлис Қонунчилик палатаси депутатлари томонидан маъқулланган.

Маълумот учун, Шерзод Хўжаев 1998−2001 йилларда Энергетика ва электрлаштириш вазирлигида дастурчи-муҳандис сифатида ишлаган. 2004 йилдан 2010 йилгача “Ўзбекэнерго” давлат акциядорлик компаниясида турли лавозимларда ишлаган, 2017 йилгача компания директори ўринбосари, 2018 йилгача компания директори вазифасини бажарган.

Хўжаев 2019−2023 йилларда Энергетика вазирининг ўринбосари, 2023 йилда вазирлик ҳузуридаги электр энергетикаси тармоғини ислоҳ қилиш бўйича лойиҳа офиси директори бўлиб ишлаган. 

Қайд этиш жоиз, Шерзод Хўжаев Ўзбекистонда кузатилган аномал совуқ шароитида электр билан боғлиқ муаммолар сабаб, фаолиятида жиддий камчиликларга йўл қўйгани учун Энергетика вазири ўринбосари лавозимидан ишдан олинганди.

Эслатиб ўтамиз, аввалроқ Жўрабек Турсунпўлатович Мирзамаҳмудов Ўзбекистон Республикаси Энергетика вазири лавозимидан озод этилгани ҳақида хабар берилганди.