Энди ўзбекистонликлар Таиланд визаси учун Москвага бориши керак

Аввалроқ, Таиланд 93 та мамлакат, жумладан, Ўзбекистон учун амал қилаётган 60 кунлик визасиз режимни бекор қилаётгани ҳақида хабар берилган эди. Эндиликда мазкур тартиб жорий йилнинг 15 сентябридан бошлаб ўзбекистонликлар учун ҳам бекор қилинади. Бу ҳақда Ўзбекистон Республикасининг Бангкок шаҳридаги Бош консулхонаси хабар берди.

Таиланд Қироллиги ҳукумати қарорига мувофиқ, ушбу санадан бошлаб Ўзбекистон Республикаси фуқаролари мамлакатга кириш учун олдиндан виза расмийлаштириши лозим.

Ўзбекистон фуқаролари Таиландга ташриф буюриш учун Таиланд Қироллигининг расмий электрон виза портали орқали электрон виза анкетасини тўлдириб, кириш визасини олишлари керак.

Электрон виза анкетаси тўлдирилгандан сўнг, виза учун тўловни амалга ошириш учун фуқаро Таиланд Қироллигининг Россия Федерациясидаги Москва шаҳрида жойлашган элчихонасига шахсан ташриф буюриши лозим.

Эслатиб ўтамиз, аввалроқ Таиланд ҳукумати жорий йилнинг 26 август куни Ўзбекистон фуқаролари учун визасиз режимни бекор қилиш ҳақида тегишли қарорни имзолагани хабар қилинган эди.