Энди фарзандли бўлган эркаклар ҳам “декрет”га чиқади

Энди Ўзбекистонда ишлаётган эркаклар фарзандли бўлганда турмуш ўртоғига ёрдам бериш ва бошқа фарзандларига қараб туриши учун қисқа муддатли таътил бериш белгиланмоқда. Бу ҳақда бугун, 5 май куни Олий Мажлис Қонунчилик палатасининг навбатдаги мажлисида кўриб чиқилган меҳнат муносабатларини такомиллаштиришга қаратилган қонун лойиҳасида сўз боради.

Унга кўра, эркаклар фарзандли бўлса, уларга турмуш ўртоғига ёрдам бериши ва бошқа фарзандларига қараб туриши учун қисқа муддатли таътил берилади. Шунингдек, меҳнат бозорида норасмий бандликни камайтириш мақсадида фуқароларни меҳнат шартномасисиз ишга қабул қилиш, бўш иш ўринлари бўйича маълумотлар тақдим этмаганлик, иш ҳақини вақтида тўламаганлик учун ҳам жавобгарлик кучайтирилмоқда.

Шу билан бирга, мазкур ҳужжат билан амалдаги қонунчиликка бир қатор ўзгартириш ва қўшимчалар киритилмоқда. Муҳокамалар давомида таъкидланганишича, қонун лойиҳаси меҳнат муносабатларини расмийлаштиришни соддалаштириш, ортиқча бюрократик тўсиқларни бартараф этиш ҳамда ходимларнинг ҳуқуқларини ишончли ҳимоя қилишга қаратилган.

Хусусан, ишга қабул қилишда талаб этиладиган ҳужжатлар рўйхати қисқартирилмоқда. Таклиф этилаётган тартибга кўра, фуқарони ишга қабул қилишда асосан унинг шахсий идентификация рақами талаб этилади. Ҳарбий хизматга мажбурлар ва чақирилувчилар эса ҳарбий гувоҳнома ёхуд ҳарбий ҳисобда турганлик ҳақидаги гувоҳнома тақдим этиши лозим.

Бундан ташқари, меҳнат муносабатларини рақамлаштиришга алоҳида эътибор қаратилмоқда. Ишга киришда электрон меҳнат дафтарчасидан кўчирма бериш бекор қилинмоқда. Шунингдек, электрон рақамли имзо ёки биометрик идентификация ( Face-ИД) орқали тасдиқланган ҳужжатлар юридик жиҳатдан қўлда имзоланган ҳужжатлар билан тенглаштирилмоқда.

Қонун лойиҳасида меҳнат жараёнида тазйиқ ва зўравонликка қарши курашишга доир нормалар ҳам ўз аксини топган. Жумладан, бундай ҳолатларни тақиқлаш, уларнинг олдини олиш ва жабрланган ходимларни ҳимоя қилиш чоралари белгиланмоқда.

Бундан ташқари, иш берувчи томонидан иш ҳақи тўлаш муддати бузилган тақдирда, ҳар бир кечиктирилган кун учун пулли компенсация тўлаш тартиби аниқлаштирилмоқда.

Муҳокамалардан сўнг, қонун лойиҳаси депутатлар томонидан биринчи ўқишда қабул қилинган.