“Эль Менчо” ўлдирилиши ортидан АҚШ Мексикани табриклади

АҚШ Давлат департаменти Мексикадаги йирик наркокартель раҳбари Немесио Осегера Сервантесни (лақаби “Эль Менчо”) ўлдирилишини “улкан воқеа” деб баҳолади. Бу ҳақда АҚШ Давлат котибининг ўринбосари Кристофер Ландау Х саҳифасида ёзиб қолдирди.

Ландаунинг айтишича, “Халиско янги авлоди” картели раҳбари Немесио Осегера Сервантес (лақаби “Эль Менчо”) энг қонхўр ва шафқатсиз наркобаронлардан бири бўлган.

Ландау Х тармоғида бу воқеани Мексика, АҚШ, Лотин Америкаси ва бутун дунё учун катта янгилик деб атаган ва Мексика ҳуқуқ-тартибот идораларини табриклаган. Шу билан бирга, у қотилликдан кейинги зўравонликлардан хавотир билдириб, “ёмонлар террор билан жавоб бериши ажаб эмас, лекин хотиржамликни йўқотмаслик керак”, деб ёзган.

Сервантес 22 февраль куни Мексика махсус кучлари операцияси вақтида ўлдирилган. Мамлакат Мудофаа вазирлиги маълум қилишича, ҳарбийлар ҳужумга учраган, отишмада картелнинг тўрт аъзоси ҳалок бўлган, уч киши оғир яраланган ва йўлда вафот этган. Улар орасида Сервантес ҳам бўлган.

Унинг ўлими ортидан камида тўққиз штатда тартибсизликлар бошланган. Автомобиллар ва дўконларга ўт қўйиш, йўлларни тўсиш ҳолатлари кузатилган.

Мексика Президенти Клаудия Шейнбаум мамлакатнинг катта қисмида вазият назоратда эканини билдирган. Шу билан бирга, Россия элчихонаси ўз фуқароларини Халиско штатига сафар қилмаслик ва одамлар тўпланган жойлардан узоқ бўлишга чақирган.

Маҳаллий ОАВларга кўра, “Эль Чапо” лақабли Хоакин Гусман Лоэра қўлга олинганидан кейин Сервантес Мексикадаги энг қудратли наркобаронга айланган. Унинг даврида картель метамфетамин ва фентанил савдосида дунёнинг 40 га яқин мамлакатигача таъсирини кенгайтирган.

Гуруҳ 2010 йилда Халиско штатида ташкил топган, кейинчалик эса бутун мамлакат бўйлаб ўз таъсирини кенгайтирган. Собиқ полициячи бўлган “Эль Менчо” АҚШга катта миқдорда кокаин, метамфетамин ва фентанил контрабандасини амалга оширган қудратли жиноий тузилмани барпо этган. АҚШ унинг жойлашувини аниқлашга ёрдам берадиган маълумот учун 15 миллион доллар мукофот эълон қилган эди.

Мексика Мудофаа вазирлиги, шунингдек, операцияни тайёрлашда ёрдам берган маълумотлар АҚШ томонидан тақдим этилганини билдирган. Рейд давомида зирҳли автомобиллар ва қуроллар, жумладан гранатомётлар мусодара қилинган.