Эбола касаллигини тўхтатиш мумкин – ЖССТ раҳбари 

Жаҳон соғлиқни сақлаш ташкилотининг Бош директори Тедрос Адханом Гебрейесус Конго Демократик Республикасига ташриф буюриб, мамлакатдаги Эбола вируси тарқалишини “тўхтатиш мумкин”лигини айтди. Бу ҳақда у конголикларга мурожаатида сўзлаган.

“Бу касалликни тўхтатиш мумкин. Биргаликда биз бу авж олган касалликни енгиб ўтамиз. Ёрдам бериш учун қўлимдан келган барча ишни қилишга ваъда бераман”, деб ёзган Тедрос конголикларга мурожаатида. 

ЖССТ маълумотига кўра, 15 май куни эълон қилинган янги Эбола тарқалиши бошланганидан бери Конго Демократик Республикасида (КДР) 10 та тасдиқланган ва 223 та гумон қилинган ўлим ҳолати қайд этилган. Вирус юқтирганлар сони эса 1000 нафардан ошган. Ташкилотга кўра, ҳақиқий кўлам бундан анча катта бўлиши мумкин, чунки вирус маълум вақт аниқланмасдан тарқалган бўлиши эҳтимоли ҳам юқори.

Маълумот ўрнида, бу КДР тарихида қайд этилган 17-Эбола эпидемияси ҳисобланади. Мамлакатда касаллик илк бор 1976 йилда аниқланган. Эбола касаллигининг дастлабки белгиларига иситма, кучсизлик, мушак оғриғи, бош оғриғи ва томоқ оғриғи киради. Кейинчалик қусиш, ич кетиши, қорин оғриғи, тошма ва буйрак ҳамда жигар фаолияти бузилиши кузатилиши мумкин. Вирус касалланган инсоннинг қони ёки бошқа биологик суюқликлари орқали юқади.

ЖССТ маълумотларига кўра, ҳозирги эпидемияда ўлим даражаси 24,6 фоизни ташкил этмоқда. Бу Эбола эпидемиялари бўйича умумий ўртача кўрсаткич – 50 фоиздан паст. Ҳозирги эпидемияга сабаб бўлган Bundibugyo штамми учун ҳозирча тасдиқланган даво йўқ. Бироқ ЖССТ вакцина ва даволаш усуллари бўйича клиник синовларни бошлашни тавсия қилган. Африка Иттифоқининг соғлиқни сақлаш агентлиги раҳбари Жан Касея эса йил охиригача вакцина тайёр бўлиши мумкинлигини билдирган.

Қўшни Уганда эса бир нафар Эбола қурбони ва яна олти ҳолат қайд этилганидан кейин КДР билан чегарасини ёпишини маълум қилган. ЖССТ чегараларни ёпиш ноқонуний ўтишларни кўпайтириб, касалликни назорат қилишни қийинлаштириши мумкинлигидан огоҳлантирган.

Эслатиб ўтамиз, аввалроқ Канада расмийлари Эбола вируси тарқалган ҳудудлардан мамлакатга борувчи сайёҳлар 21 кун давомида ўз-ўзини изоляция қилиши шартлигини эълон қилган эди.