Эбола “қутурмоқда”: Нигерияда ҳам касалланиш ҳолати қайд этилди

Нигерия пойтахти Абужада Эбола вируси билан касалланиш ҳолати қайд этилди. Бу ҳақда “The Guardian” хабар берди.

Маълум қилинишича, Уганда орқали мамлакатга келган аёлда вирус аниқланган. Унда касаллик аломатлари жорий йилнинг 7 октябрь куни бошланган. У тўрт кун ўтиб Абуджа шаҳридаги шифохонага ётқизилган ва кейинчалик Эбола билан касаллангани тасдиқланган. Беморнинг Нигерияга қачон келгани ҳозирча номаълум.

Нигерия соғлиқни сақлаш вазири Муҳаммад Пате бемор билан алоқада бўлган 44 киши аниқланганини ва уларда вирус бор-йўқлиги текширилаётганини маълум қилган.

Уганда Соғлиқни сақлаш вазирлиги эса бемор мамлакат ҳудудидан фақат транзит орқали ўтганини билдирган. Вазирлик маълумотига кўра, у Нигерия фуқароси бўлиб, Конго Демократик Республикасининг шарқий ҳудудига хизмат сафари билан борган. Бироқ Нигерия расмийлари беморнинг фуқаролигини ошкор қилмаган.

“Уганда орқали саёҳат қилгани вирус айнан шу ерда юққанини англатмайди. Инфекция қаерда юққани ҳозирча ўрганилмоқда”, дейилади Уганда Соғлиқни сақлаш вазирлиги баёнотида.

Шунингдек, вазирлик мамлакатда Эбола билан касалланишнинг фаол ҳолатлари тасдиқланмаганини таъкидлаган.

Нашрга кўра, Нигерия Ғарбий Африкада тарқалаётган Эбола эпидемияси қайд этилган навбатдаги мамлакат бўлди. Кения ҳам шу ой бошида касалликнинг илк ҳолатини тасдиқлаган, шундан буён мамлакатда тўққизта зарарланиш ҳолати қайд этилган. Уганда эса аввалроқ Эбола билан касалланиш ҳолатлари ҳақида хабар берган, кейинчалик мамлакатда эпидемия тугаганини эълон қилган.

Африка касалликларни назорат қилиш ва олдини олиш марказлари бош директори Жан Касея X ижтимоий тармоғида вазиятни “ниҳоятда жиддий таҳдид” деб атаган. Унинг айтишича, касалликдан ўлим даражаси қарийб 50 фоизни ташкил этмоқда.

Унинг таъкидлашича, Бундибугио тури билан боғлиқ Эбола эпидемияси тарихдаги энг кенг ҳудудга тарқалган эпидемияга айланган. Касаллик Африканинг учта минтақасидаги бир нечта мамлакатда қайд этилган.

Нигерия Касалликларни назорат қилиш маркази икки ҳафта аввал Кенияда Эбола аниқланганидан сўнг мамлакатдаги эпидемиологик кузатувни кучайтирганини билдирган. Шунингдек, эҳтимолий эпидемия ҳолатига тайёргарлик чоралари кучайтирилган.

Эслатиб ўтамиз, Эбола эпидемияси жорий йилнинг май ойида Конго Демократик Республикасида бошланган. Жорий йилнинг 15 май куни вирус лабораторияда тасдиқланган. Шундан сўнг касаллик бошқа мамлакатларга ҳам тарқалиб, 9,5 мингдан ортиқ одамни зарарлаган ва 4,6 мингдан зиёд кишининг ўлимига сабаб бўлган.