6000 метр баландликда самолёт эшигини очишга уринган йўловчи вафот этди (видео)

Жорий йилнинг 6 октябрь куни Нигерияда Найроби–Лагос йўналишида учаётган самолёт йўловчиси парвоз вақтида экипаж аъзоларига қаршилик кўрсатиб, кабина ва самолёт эшигини очишга уринганидан сўнг вафот этди. Бу ҳақда Нигерия Фуқаро авиацияси бошқармасига таяниб, “Legit.ng” хабар берди.

Қайд этилишича, йўловчи дастлаб авиакомпания томонидан Мадагаскарга олиб борилган. Бироқ у мамлакат божхона органлари томонидан ортга қайтарилган ва Мадагаскарга киришига рухсат берилмаган. Шундан сўнг, Kenya Airways уни ўша йўналиш бўйича Нигерияга қайтаришга мажбур бўлган.

Қайтиш парвози вақтида эркак тажовузкор ҳаракат қила бошлаган. У дастлаб учувчилар кабинасига киришга уринган, бироқ бунга эриша олмаган. Шундан сўнг, самолётнинг орқа эшигини очишга ҳаракат қилган.

Бошқа йўловчилар хавфсизлигини таъминлаш мақсадида экипаж аъзолари уни ушлаб, қўлларини орқасидан боғлаган. Ижтимоий тармоқларда тарқалган видеода йўловчининг самолёт ҳавода бўлган вақтда эшикни очишга уринаётгани акс этган.

Kenya Airways’нинг маълум қилишича, йўловчи самолёти Лагосга қўнишига тахминан 20 дақиқа қолганда ҳушсиз ҳолатга келган. Экипаж унга зудлик билан биринчи тиббий ёрдам кўрсатган. Самолёт Лагосдаги Муртала Муҳаммад халқаро аэропортига тахминан соат 21:41 да қўнган. Шундан сўнг тиббиёт ходимлари йўловчини кўздан кечирган, бироқ унинг вафот этгани аниқланган.

Ҳозирча марҳумнинг шахси, фуқаролиги, ёши ва ўлим сабаби ошкор қилинмаган. Мазкур ҳолат юзасидан Нигерия полицияси тергов олиб бормоқда. Нигерия Фуқаро авиацияси бошқармаси вакили Майкл Ачимугум ҳодиса сабабларини тергов якунлангунига қадар хулоса қилмасликка чақирган. Унинг сўзларига кўра, марҳумнинг оиласи зарур деб топса, суд-тиббий экспертиза ўтказилишини сўраши мумкин.

Kenya Airways марҳумнинг яқинларига ҳамдардлик билдириб, терговда маҳаллий органлар ва авиация назорати идораларига ҳамкорлик қилишини маълум қилган.

Эслатиб ўтамиз, аввалроқ Нигериянинг жануби-ғарбий қисмидаги Ондо штатида ҳарбий самолёт қулаши оқибатида бортдаги 25 йўловчи ва 7 экипаж аъзоси, жами 32 киши ҳалок бўлгани ҳақида хабар берилган эди.