Дуров Telegram Францияда норозилик воситасига айланганидан фахрланишини айтди
Олам
−
10 Сентябрь 3067 2 дақиқа
Telegram асосчиси Павел Дуров мессенжернинг Францияда Президент Эммануэль Макроннинг “муваффақиятсиз сиёсати”га қарши норозилик намойишларида тутган ролидан фахрланади. Бу ҳақда у ўзининг Х саҳифасида ёзди.
“Telegram Францияда Макроннинг муваффақиятсиз сиёсатига қарши норозилик намойишлари воситаси эканидан фахрланаман. Саккиз йиллик эътиборсизликдан сўнг одамлар қуруқ пиар ва постуриядан чарчади, эндиликда улар жавоб қайтармоқда”, дея ёзган тадбиркор.
“Reuters”нинг ёзишича, 10 сентябрь куни Францияда кенг кўламли норозилик намойишлари бўлиб ўтиши кутилмоқда, иштирокчилар “Ҳамма нарсани блокировка қилинг” шиорини қўллаб-қувватламоқда. Ҳаракат май ойида ўта ўнг гуруҳлар ўртасида интернетда пайдо бўлган. Ҳозир уни чап қанот фаоллари қўллаб-қувватламоқда. Бироқ, ҳаракат марказлашмаган ва ижтимоий тармоқлар ҳамда Telegram орқали ўз-ўзидан яратилган, шунинг учун агентлик намойишлар қанчалик кенг кўламли бўлиши мумкинлигини тахмин қила олмаслигини ёзган.
Павел Дуров ўтган йили 24 август куни кечқурун Париж аэропортида қўлга олинганди. Франция ҳукумати Дуровни ҳибсга олиш учун ордерни 2024 йил 25 мартда берган. Шу билан бирга, унинг акаси, Telegram асосчиси Николай Дуровни ҳибсга олиш учун ҳам ордер берилганди. Ҳибсга олиш учун ордерлар “вояга етмаганларнинг порнографик тасвирларига эгалик қилиш, тарқатиш ёки улардан фойдаланишни таклиф қилишда иштирок этганлик” учун чиқарилган.
26 август куни тушдан кейин Франция прокуратураси 12 та жиноят бўйича номаълум шахсларга нисбатан тергов ҳаракатлари олиб борилаётгани ҳақида пресс-релиз эълон қилди. Улар орасида ваколатли органлар сўровига кўра маълумот беришдан бош тортиш, вояга етмаганларнинг порнографик тасвирларини сақлашга шериклик, гиёҳванд моддаларни тарқатишда иштирок этиш, хакерлик дастурларини тарқатишда иштирок этиш кабилар бор.
28 август куни Дуров Парижда ҳибсдан 5 миллион евро гаров эвазига озод қилинди. Унга Франциядан чиқиб кетиш тақиқланди ва ҳафтасига икки марта полицияга хабар бериб туриши шарти қўйилди.
Кейинроқ эса Дуров ҳозиргача Францияни тарк эта олмаганидан ажабланаётгани ва бундан норози эканини маълум қилди.
Эслатиб ўтамиз, аввалроқ Франция Президенти Эммануэль Макрон Франция Миллий Ассамблеяси Франсуа Байру ҳукуматига ишончсизлик вотумини қабул қилганидан бир кун ўтиб, мамлакат Мудофаа вазири ва унинг иттифоқчиси Себастьен Лекорнюни Бош вазир этиб тайинлаганди.
