Демократлар Трамп Эпштейнга юборган “откритка”ни эълон қилди
Олам
−
09 Сентябрь 2025 5166 2 дақиқа
Кеча, 8 сентябрь куни АҚШ Конгресси Вакиллар палатасидаги "Демократлар" партияси аъзолари АҚШ Президенти Дональд Трамп томонидан имзоланган ва молиячи Жеффри Эпштейнга 20 йилдан кўпроқ вақт олдин юборилгани даъво қилинган табрикнома суратини чоп этди.
“Трампдан Жеффри Эпштейнга туғилган куни муносабати билан юборилган хатни топдик, Президентнинг айтишича, у йўқ эди. Трамп иккаласининг “ажойиб сири” борлигини ёзади. У нимани яширмоқда? (Эпштейн иши бўйича) Ҳужжатларни ошкор қилинг”, дейилади демoкратларнинг постида.
Вакиллар палатасининг Назорат ва ҳукумат ислоҳоти қўмитаси аъзолари бўлган демократлар Х ижтимоий тармоғида "откритка" эълон қилингани ҳақида фикр билдирди. Почта карточкасида яланғоч аёл танасининг схематик силуэти тасвирланган бўлиб, унинг устида “Жеффри” ва “Дональд” ўртасидаги диалог босилган.
Хат: “Туғилган кунингиз билан ва ҳар куни янги ажойиб сир бўлсин”, деган жумла билан тугайди.
“The Wall Street Journal”нинг хабар қилишича, 8 сентябрь куни Эпштейннинг мулкини бошқараётган адвокатлар қўмитага унинг 2003 йилдаги 50 ёшга тўлган туғилган куни албоми нусхасини, жумладан, Трамп имзолаган картани берган.
Оқ уй матбуот котиби Кэролайн Ливитт WSJ нашрини, шунингдек, “туғилган кун ҳақидаги карта ҳикоясини” ёлғон деб атади.
“Мен айтганимдек, бу аниқ: Президент Трамп бу расмни чизмаган ёки имзоламаган”, деб ёзади у Х'да.
Ливиттнинг қўшимча қилишича, Трампнинг ҳуқуқшунослар жамоаси суд ишларини давом эттиради.
Оқ уй аппарати раҳбари ўринбосари Тейлор Будович Х'даги саҳифасига Президент имзосининг бир нечта намуналарини жойлаштирди ва картадаги имзо сохта эканини ёзиб, WSJ'ни туҳматда айблади.
Июль ойида “The Wall Street Journal” биринчи марта "откритка" борлиги ҳақида хабар берганида Дональд Трамп буни ёлғон деб атаган ва у бундай ҳеч нарса ёзмаганини айтган. АҚШ Президенти газета ва унинг эгаси, медиамагнат Руперт Мердок устидан судга мурожаат қилди.
