Дембеле жароҳатидан сўнг сафга қайтди

ПСЖ ҳужумчиси Усмон Дембеле жароҳатидан сўнг илк бор ўйин қайдномасига киритилди. У 20 октябрь куни жамоа билан Чемпионлар лигасида “Байер Леверкузен”га қарши ўйинда қатнашиш учун Германияга йўл олади. Бу ҳақда “L’Equipe” нашри хабар берди.

Дембеле бир неча кун машғулотларда иштирок этган бўлса-да, эҳтиёткорлик сабабли “Страсбур”га қарши 3:3 ҳисобидаги дуранг ўйинда майдонга тушмаган. Бу ҳужумчи учун “Олтин тўп”ни қўлга киритгандан кейин жамоадаги илк ўйини бўлади.

Шунингдек, жароҳат сабаб ўйинларда қатнаша олмаётган Маркиньос ҳам жамоанинг Чемпионлар лигаси сафарига қўшилди.

Усмон Дембеле охирги бор 5 сентябрь куни Франция миллий терма жамоасининг Украинага қарши ўйини давомида майдонга тушган ва жароҳат туфайли ўйинни тарк этган эди. Маркиньос эса охирги марта 20 сентябрь куни “Марсел”га қарши ўйинда майдонга тушган.

Маълумот учун, Чемпионлар лигаси доирасидаги учрашувни жамоа ярим ҳимоячилар Фабиан Руис ва Жоау Невиш ўтказиб юборади. ПСЖнинг “Байер Леверкузен”га қарши учрашуви жорий йилнинг 22 октябрга ўтар кечаси старт олади.