Давлат идораларининг хатоси туфайли эркак қарийб уч йил ҳибсда сақланди

Австралияда фуқаролик мақоми нотўғри аниқлангани сабабли бир эркак 945 кун давомида миграция марказида ноқонуний сақланди. У қамоқ жазосини ўтаб бўлганидан кейин ҳам озодликка чиқарилмай, мамлакатдан депортация қилинишига уринишлар бўлди. Бу ҳақда мамлакат омбудсмани ҳисоботига таяниб, ABC News хабар берди.

Ҳужжатларда Макс B. деб кўрсатилган эркак 1989 йилда Австралияда Янги Зеландия фуқаролари оиласида туғилган. Ота-онаси уни чақалоқлигида қисқа муддатга чет элга олиб чиққан бўлса-да, 1992 йилда оила Австралияга қайтган. Мамлакат қонунчилигига мувофиқ, Макс 10 ёшида автоматик равишда Австралия фуқаролигини олган.

Бироқ 2018 йилда, у қамоқ жазосини ўтаётган пайтда, Ички ишлар вазирлиги унинг фуқаролик мақомини текшириб, болалигида мамлакатдан вақтинча чиқиб кетганини нотўғри талқин қилган. Оқибатда у Австралия фуқароси эмас, деган хулосага келинган. 2019 йилдаги иккинчи текширувда ҳам ушбу хато такрорланган.

Макс B. 2010 йилда жиноят содир этгани учун қамоқ жазосига ҳукм қилинган. 2022 йилда жазо муддатини ўтаб бўлгач, уни озод қилиш ўрнига миграция марказига жойлаштиришган ва депортация қилишга ҳаракат қилишган.

У ҳибсда сақланган вақтда бир неча бор Австралия фуқароси эканини билдирган. 2024 йилда адвокати ҳам буни тасдиқловчи далилларни тақдим этган, аммо учинчи текширувда ҳам аввалги хулоса ўзгартирилмаган.

Фақат 2025 йил апрелида Янги Зеландия ҳукумати Макс B. ушбу мамлакат фуқароси эмаслигини тасдиқлаган. Шундан сўнг, уни депортация қилиш имкони йўқлиги аниқланиб, у қатъий шартлар асосида озод этилган. Кейинги, тўртинчи текширувда эса унинг Австралия фуқароси экани тасдиқланган.

Маржона Маманиёзова